Бир намайишчини калтәк билән урған хоңкоң сақчиси 3 айлиқ қамаққа һөкүм қилинди

Мухбиримиз шөһрәт һошур
2018-01-03
Елхәт
Пикир
Share
Принт

2014‏-Йили хоңкоңда йүз бәргән кәң көләмлик намайиш давамида бир намайишчини калтәк билән урған сақчи хадими франкий чу йеқинда хоңкоң соти тәрипидин 3 айлиқ қамаққа һөкүм қилинған.

Ройтерз агентлиқиниң бүгүнки бу һәқтики хәвиридә дейилишичә, мәзкур сақчиға әслидә 4 айлиқ қамақ җазаси мувапиқ көрүлгән, әмма униң пенсийәгә чиққан бир сақчи икәнлики вә қилмишини тәкрарлаш еһтимали йоқлуқи көздә тутулуп, җаза үч айға чүшүрүлгән. Хоңкоң соти өткән йили 12 нәпәр сақчини намайишчиларға һәддидин зиядә күч ишлитиш билән әйибләп икки йиллиқтин қамаққа һөкүм қилған.

Хитай сақчилири 2009‏-йили «5‏-июл вәқәси» дә намайишчиларға қара-қоюқ оқ чиқарған, бир қисим тутқунларниң из-дерикини йоқитивәткән болсиму, хитай әдлийә тармақлири буларниң һечбириниң һесабини соримиған иди.

Мустәқил тәтқиқатчи илһам тохти «уйғурбиз» торида мақалә елан қилип, хитай даирилирини ғайиб қиливетилгән уйғурлар һәққидә җәмийәткә мәлумат бериш вә ғайиблар паҗиәсидә мәсулийити бар сақчи хадимлирини җавабкарлиққа тартишқа чақирған иди. У бу тәклипини районда милләтләр мунасивитини яхшилаш вә дөләт бихәтәрликиниң асасини яритиш нуқтисидин оттуриға қойған болсиму, әмма даириләр уйғур районидики сақчилирини җазалашни халимиған. Буниң орниға илһам тохтини «бөлгүнчилик» билән әйибләп, уни муддәтсиз қамаққа һөкүм қилған иди.

Пикирләр (0)
Share
Толуқ бәт