Хоңкоңниң террорлуққа қарши туруш қисимлири һәйити уйғур елигә «тәҗрибә» өгинишкә маңған

Мухбиримиз ирадә
2018-12-06
Елхәт
Пикир
Share
Принт

Хоңкоңниң террорлуққа қарши туруш қисимлири «тәҗрибә» өгиниш үчүн уйғур елигә маңған. Җәнубий хитай сәһәр гезитиниң пәйшәнбә күни тарқатқан хәвиридин қариғанда, хоңкоңниң террорлуққа қарши туруш вәзипә қисимлири һәйити пәйшәнбә күни уйғур елигә қарап йолға чиққан.

Мәзкур гезитни учур билән тәминлигән мәнбәниң әскәртишичә, бу қетимлиқ зиярәт уйғур елидики террорлуққа қарши туруш қисимлириниң хизмәт «тәҗрибилири» ни өгинишни мәқсәт қилған икән. Исмини ашкарилимиған бу һөкүмәт хадими гезиткә қилған сөзидә, бу зиярәтниң хоңкоңниң уйғур елидә йолға қоюлған лагерларни қоллайдиғанлиқини вә бу лагер түзүминиң хоңкоңғиму тәтбиқлинидиғанлиқидин дерәк бәрмәйдиғанлиқини билдүргән.

Бирақ, мәзкур хәвәр елан қилинғандин кейин твиттер қатарлиқ иҗтимаий тор бәтләрдә күчлүк диққәт қозғиди. Чүнки, техи йеқинда ниңшя туңган аптоном районлуқ парткомниң секретари җаң йүншеңму мана мушу мәқсәттә уйғур елини зиярәт қилған. Зиярәт ахирида ниңшя билән уйғур ели арисида «террорлуққа қарши туруш һәмкарлиқ келишими» мақулланған иди. Нурғун хитай вәзийити көзәткүчилири бүгүн твиттердики инкасида хоңкоңдики бу хәвәргә инкас қайтуруп, буниң хәтәрлик бир йүзлиниш икәнликини билдүрүшти.

Җәнубий хитай сәһәр гезитиниң игилишичә, уйғур елигә қарап йолға чиққан һәйәткә хоңкоңниң муавин хәвпсизлик министири соний ачваң башчилиқ қилған. Һәйәттики қалған 7 әза болса бу йил 4-айда қурулған «министирлиқлар ара террорлуққа қарши туруш гурупписи» ниң әзалири болуп, улар уйғур елидә 5 күн туруп, террорлуққа қарши туруш тәдбирлири вә әслиһәлирини өгинидикән.

Юқиридики һөкүмәт хадими гезиткә қилған сөзидә уйғур елидә кәң көләмлик өлүм-йетимниң алдини елиш үчүн террорлуқ һуҗумиға пәқәт бир минут ичидила инкас қайтурулуп болидиғанлиқини ейтип «мәнчә уларниң қандақ қилип бунчә қисқа вақит ичидә инкас қайтуруп болидиғанлиқини өгинишкә әрзийду» дегән.

Хоңкоң хәвпсизлик даирилири мәзкур учурниң тоғрилиқини дәлиллигән.

Пикирләр (0)
Share
Толуқ бәт