Xongkongning térrorluqqa qarshi turush qisimliri hey'iti Uyghur élige "Tejribe" öginishke mangghan

Muxbirimiz irade
2018-12-06
Élxet
Pikir
Share
Print

Xongkongning térrorluqqa qarshi turush qisimliri "Tejribe" öginish üchün Uyghur élige mangghan. Jenubiy xitay seher gézitining peyshenbe küni tarqatqan xewiridin qarighanda, xongkongning térrorluqqa qarshi turush wezipe qisimliri hey'iti peyshenbe küni Uyghur élige qarap yolgha chiqqan.

Mezkur gézitni uchur bilen teminligen menbening eskertishiche, bu qétimliq ziyaret Uyghur élidiki térrorluqqa qarshi turush qisimlirining xizmet "Tejribiliri" ni öginishni meqset qilghan iken. Ismini ashkarilimighan bu hökümet xadimi gézitke qilghan sözide, bu ziyaretning xongkongning Uyghur élide yolgha qoyulghan lagérlarni qollaydighanliqini we bu lagér tüzümining xongkongghimu tetbiqlinidighanliqidin dérek bermeydighanliqini bildürgen.

Biraq, mezkur xewer élan qilin'ghandin kéyin twittér qatarliq ijtima'iy tor betlerde küchlük diqqet qozghidi. Chünki, téxi yéqinda ningshya tunggan aptonom rayonluq partkomning sékrétari jang yünshéngmu mana mushu meqsette Uyghur élini ziyaret qilghan. Ziyaret axirida ningshya bilen Uyghur éli arisida "Térrorluqqa qarshi turush hemkarliq kélishimi" maqullan'ghan idi. Nurghun xitay weziyiti közetküchiliri bügün twittérdiki inkasida xongkongdiki bu xewerge inkas qayturup, buning xeterlik bir yüzlinish ikenlikini bildürüshti.

Jenubiy xitay seher gézitining igilishiche, Uyghur élige qarap yolgha chiqqan hey'etke xongkongning mu'awin xewpsizlik ministiri soniy achwang bashchiliq qilghan. Hey'ettiki qalghan 7 eza bolsa bu yil 4-ayda qurulghan "Ministirliqlar ara térrorluqqa qarshi turush guruppisi" ning ezaliri bolup, ular Uyghur élide 5 kün turup, térrorluqqa qarshi turush tedbirliri we eslihelirini öginidiken.

Yuqiridiki hökümet xadimi gézitke qilghan sözide Uyghur élide keng kölemlik ölüm-yétimning aldini élish üchün térrorluq hujumigha peqet bir minut ichidila inkas qayturulup bolidighanliqini éytip "Menche ularning qandaq qilip bunche qisqa waqit ichide inkas qayturup bolidighanliqini öginishke erziydu" dégen.

Xongkong xewpsizlik da'iriliri mezkur uchurning toghriliqini delilligen.

Toluq bet