Xitay soti xongkongluq zhurnalistlarni qamaq jazasigha buyrudi

Muxbirimiz jüme
2016-07-27
Share

Xitay soti charshenbe küni ikki neper xongkongluq zhurnalistni öz ichide alghan 4 kishini "Qanunsiz soda qilish jinayiti" bilen eyiblep, qamaq jazasigha buyrughanliqini élan qildi.

Wang jyenmin we go jungshyaw isimlik bu zhurnalistlarning her ikkilisi xongkongda chiqidighan "Asiya heptiliki" zhurnilining xizmetchiliri bolup, ular 2014-yili shénjénda tutup kétilgen iken.

Shénjén soti wang jyenmin'ge 5 yil 3 ayliq qamaq jazasi, go jungshyawgha 2 yil 3 ayliq qamaq jazasi bergendin sirt, ularning her ikkilisige ayrim-ayrim 20 ming we 50 ming somdin jerimane qoyghan.

Melum bolushiche, bular tutup kétilishtin ilgiri öz aldigha "Yéngi yol ayliq zhurnili" we "Chiraylar" namliq ikki parche zhurnalni chiqarghan iken. Sotta ular chiqarghan neshri buyumliri "Qanunsiz neshr buyumliri" dep atilip, ulargha bu zhurnallarni xitay ichidiki oqurmenlirige ewetish jinayiti artilghan.

Emma birleshme agéntliqida wangning adwokatining éytqanliridin neqil élip xewer qilishiche, bular hergizmu özliri chiqarghan zhurnallargha xet arqiliq mushteri qobul qilmighan yaki xet arqiliq neshr buyumlirini xitaygha yollimighan. Belki ular ilgiri-kéyin bolup 8 parche zhurnalni xitaydiki dostlirigha ewetip bergen iken.
Bularning xongkong puqrasi yaki emesliki hazirche éniq emes bolup, mezkur zhurnalistlarning xitayda jazagha tartilishi yérim musteqil xongkongdiki axbarat erkinliki mesilisige qara kölengge tashlaydiken.

Halbuki, bu nöwet yuqiriqi ikki zhurnalist bilen birge jazagha tartilghan bashqa ikki neper gumandarning kimliki heqqidiki xewerler hazirche toluq emes.

Mezkurlarning türmige tashlinishi 5 neper xongkongluq kitab sodigerining tuyuqsiz yoqa kétip peyda qilghan ghulghula téxi bésiqmighan mezgilge toghra keldi.

Ötken yili yuqiri derijilik xitay emeldarlirining shexsiy hayati heqqide kitab neshr qilip dang chiqarghan xongkongdiki tongluwen kitabxanisining 5 xadimi tuyuqsiz yoqap kétip, bir mezgil ötkendin kéyin xitayda téléwizorgha chiqirilip towa qildurulghan idi.

Xongkongluq kitab sodigiri lin rungjin shularning biri. U, ötken ay qoyup bérilgendin kéyin xitay da'irilirining yene tehdit sélishigha uchrighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet