1‏-Июл күни он миңлиған хоңкоңлуқ намайиш қилип хитайға наразилиқ билдүрди

Мухбиримиз әркин
2018-07-02
Елхәт
Пикир
Share
Принт

1‏-Июлдики хоңкоңниң хитайға қайтуруп берилгәнликиниң 21‏-йиллиқ хатирә күнидә он 50 миң хоңкоң пуқраси намайиш қилип, йәрлик һөкүмәткә вә хитай компартийәсиниң хоңкоңға сиңип киришигә наразилиқ билдүргән.

Хитай һөкүмити 1997‏-йили әнглийә мустәмликисидики хоңкоңни қайтурувалғанда униң сиясий-иқтисадий системисиға чеқилмаслиққа вәдә бәргән болсиму, лекин нурғун хоңкоңлуқлар хитайниң вәдисидә турмиғанлиқини илгири сүрүп кәлди.

1‏-Июл наразилиқ намайишини «хоңкоң демократийә партийәси» тәшкиллигән болуп, мәзкур партийә намайишқа 50 миң адәм қатнашқанлиқини билдүргән.

Хоңкоң «әйнәк гезити» ниң хәвәр қилишичә, «хоңкоң демократийә партийәси» ниң рәиси ху җивей 1‏-июл намайишиниң «бир партийә диктаторилиқиға хатимә бериш, униң хоңкоңға сиңип киришни рәт қилиш» ни асас мәқсәт қилғанлиқини билдүргән. Лекин хоңкоң алаһидә районлуқ һөкүмитиниң шу күни елан қилған баянатида намайишчиларни тәнқидләп, өктичиләрниң бу һәрикитиниң «хоңкоңниң омумий мәнпәәти вә тәрәққиятиға пайдилиқ әмәс» ликини илгири сүргән.

«Хоңкоң демократийә партийәси» ниң рәиси ху җивей хоңкоң йәрлик һөкүмитини намайишчиларға қара сүркәш билән тәнқидләп, бу хоңкоң алаһидә райониниң мәмурий әмәлдари лин җинйөниң «хоңкоң хәлқи билән бир сәптики шәхс әмәсликини көрситиду,» дегән.

У бир партийә диктаторилиқиға қарши туруш һәққидә тохтилип, хоңкоң билән хитайниң демократийәгә қарап меңиши керәкликини илгири сүргән. У «бир партийә диктаторилиқиға хатимә бериш хәлқни дөләтниң һәқиқий хоҗайиниға айландуруштики зөрүр асаси қанун ислаһатидур,» дегән. Хоңкоңлуқлар 2003‏-йилдин бери һәр йили 1‏-июл күни намайиш қилип, хитай һөкүмитигә наразилиқ билдүрүп кәлмәктә.

Пикирләр (0)
Share
Толуқ бәт