1‏-Iyul küni on minglighan xongkongluq namayish qilip xitaygha naraziliq bildürdi

Muxbirimiz erkin
2018-07-02
Élxet
Pikir
Share
Print

1‏-Iyuldiki xongkongning xitaygha qayturup bérilgenlikining 21‏-yilliq xatire künide on 50 ming xongkong puqrasi namayish qilip, yerlik hökümetke we xitay kompartiyesining xongkonggha singip kirishige naraziliq bildürgen.

Xitay hökümiti 1997‏-yili en'gliye mustemlikisidiki xongkongni qayturuwalghanda uning siyasiy-iqtisadiy sistémisigha chéqilmasliqqa wede bergen bolsimu, lékin nurghun xongkongluqlar xitayning wediside turmighanliqini ilgiri sürüp keldi.

1‏-Iyul naraziliq namayishini "Xongkong démokratiye partiyesi" teshkilligen bolup, mezkur partiye namayishqa 50 ming adem qatnashqanliqini bildürgen.

Xongkong "Eynek géziti" ning xewer qilishiche, "Xongkong démokratiye partiyesi" ning re'isi xu jiwéy 1‏-iyul namayishining "Bir partiye diktatoriliqigha xatime bérish, uning xongkonggha singip kirishni ret qilish" ni asas meqset qilghanliqini bildürgen. Lékin xongkong alahide rayonluq hökümitining shu küni élan qilghan bayanatida namayishchilarni tenqidlep, öktichilerning bu herikitining "Xongkongning omumiy menpe'eti we tereqqiyatigha paydiliq emes" likini ilgiri sürgen.

"Xongkong démokratiye partiyesi" ning re'isi xu jiwéy xongkong yerlik hökümitini namayishchilargha qara sürkesh bilen tenqidlep, bu xongkong alahide rayonining memuriy emeldari lin jinyöning "Xongkong xelqi bilen bir septiki shexs emeslikini körsitidu," dégen.

U bir partiye diktatoriliqigha qarshi turush heqqide toxtilip, xongkong bilen xitayning démokratiyege qarap méngishi kéreklikini ilgiri sürgen. U "Bir partiye diktatoriliqigha xatime bérish xelqni döletning heqiqiy xojayinigha aylandurushtiki zörür asasi qanun islahatidur," dégen. Xongkongluqlar 2003‏-yildin béri her yili 1‏-iyul küni namayish qilip, xitay hökümitige naraziliq bildürüp kelmekte.

Toluq bet