Хоңкоңда хитайниң асасий қанун өзгәртишигә қарши намайиш болди

Мухбиримиз үмидвар
2018-03-04
Елхәт
Пикир
Share
Принт

Хитайниң 13-нөвәтлик мәмликәтлик сиясий кеңишиниң биринчи қетимлиқ йиғини бейҗиңда башланған болуп, хитайниң асаси қануниға түзитиш киргүзүш, йәни дөләт рәисиниң вәзипә өтәш қетим саниниң бикар қилинишни қарар қилмақчи болуш хәлқаралиқ ғулғулиларни қозғаватқанда, хоңкоңда наразилиқ намайиши өткүзүлди.

4-Март күни хоңкоңдики бир қисим демократик партийә вә аммиви тәшкилат вәкиллири бейҗиңниң хоңкоңда турушлуқ иш беҗириш орни алдида йиғилиш өткүзүп, хитай һөкүмитиниң дөләт рәисиниң вәзипә өтәш чәклимисини бикар қилиши вә шәхсий илаһлаштурушқа қарши мәйданини билдүргән. 

Америка авазиниң хәвәр қилишичә, мәзкур наразилиқ паалийитини тәшкиллигүчи гуруһлардин «хоңкоң аһалилириниң вәтәнпәрвәрләр вә демократларни қоллаш бирләшмиси» билән «хоңкоң сотсиял демократлар иттипақи» қатарлиқларниң мәсуллири сөз қилип, мустәбитликни түгитишни, хәлқ қурултийи вәкиллириниң йиғинда асасий қанун өзгәртишкә қарши беләт ташлишини тәләп қилған. Гәрчә, намайишчиларниң сани бәк көп болмисиму, әмма улар қоллирида «шәхсини илаһлаштурушқа қарши турайли», «мустәбитликни тирилдүрүшкә қарши турайли» дегәндәк түрлүк плакатларни көтүрүп вә шу хилдики шоарларни товлап, хоңкоң хәлқиниң арзусини ипадилигән.

Намайишчилар өзлириниң хитайдики мустәбитликниң күчийишигә әгишип, бейҗиңниң «бир дөләттә икки хил түзүм», «хоңкоңлуқлар хоңкоңни идарә қилиш» қатарлиқ вәдилиридин йенивелиш әндишилирини билдүрүшкән.

Пикирләр (0)
Share
Толуқ бәт