Хоңкоңда 2 милйондәк адәм намайиш қилип, «қачқунларни өткүзүп бериш қанун» ниң бикар қилинишини тәләп қилди

Мухбиримиз әркин
2019-06-17
Елхәт
Пикир
Share
Принт

Хоңкоңда 16‏-июн күни икки милйондәк адәм намайиш қилип, хоңкоң даирилириниң «қачқунларни өткүзүп бериш қанун лайиһиси» ни бикар қилишини тәләп қилди. Бу, хоңкоңда йеқинқи бир һәптә ичидә партлиған 2‏-қетимлиқ зор көләмлик намайиштур. Чәтәл таратқулириниң илгири сүрүшичә, бу хоңкоң тарихида партлиған адәм сани әң көп бир қетимлиқ намайиш икән. Хоңкоңда 9‏-июн күни партлиған 1‏-қетимлиқ намайишқа бир милйон 300 миңдәк адәм қатнашқаниди. Сақчи тәрәп йәкшәнбә күнидики намайишқа 338 миң адәм қатнашқанлиқини илгири сүргән болсиму, лекин намайишни тәшкиллигүчиләр униңға 2 милйондәк адәм қатнашқанлиқини билдүрмәктә.

Б д т ниң хәвиридә илгири сүрүлүшичә, «кишилик һоқуқ фронти» намлиқ аммиви гуруһниң мәсули җимий ши, йәкшәнбә күни мухбирларға баянат берип, «бүгүнки намайишқа 2 милйондәк адәм қатнашти» дегән. Хоңкоң валиси лин җенйүй хәлқниң бесимида шәнбә күни «қачқунларни өткүзүп бериш қануни» ни музакирә қилишниң тохтитилғанлиқини елан қилған, шуниңдәк йәкшәнбә күни мәзкур қанун лайиһиси үчүн кәчүрүм сориған. Лекин намайишчилар йәкшәнбә күни қанун лайиһисиниң тохтитилиши йетәрлик әмәслики, униң пүтүнләй бикар қилиниши вә хоңкоң валийсиниң истепа беришини тәләп қилған.

Хоңкоң валийси лин җенйүниң «қачқунларни өткүзүп бериш қанун лайиһиси» тәйярлап, хоңкоң парламентиға сунуши хоңкоң хәлқидә қаттиқ әндишә қозғап, бу қетимқи намайишниң партлишиға сәвәб болған. Хоңкоңлуқларниң илгири сүрүшичә, бу қанун хоңкоңниң демократийә вә әдлийә мустәқиллиқиға бузғунчилиқ қилип, уни хитайниң адәттикидәк бир өлкисигә айландуруп қойидикән.

Хоңкоң хәлқиниң наразилиқ намайиши хәлқарада зор қоллашқа еришкән. Д у қ баянат елан қилип, хоңкоң хәлқини қоллайдиғанлиқи, уларға һәмдәмдә болидиғанлиқи, хоңкоң хәлқиниң «әркинлики вә һоқуқини қоғдаш үчүн кәң көләмлик һәрикәткә өткәнликидин илһамланғанлиқи» ни билдүргән иди. Мәлум болушичә, 16‏-июндики намайишта һечқандақ тоқунуш йүз бәрмигән. Намайишчилар хоңкоң викторийә бағчисидин йолға чиқип, парламентқа қәдәр йүрүш қилған.

Пикирләр (0)
Share
Толуқ бәт