Xongkongda 2 milyondek adem namayish qilip, “Qachqunlarni ötküzüp bérish qanun” ning bikar qilinishini telep qildi

Muxbirimiz erkin
2019.06.17

Xongkongda 16‏-iyun küni ikki milyondek adem namayish qilip, xongkong da'irilirining “Qachqunlarni ötküzüp bérish qanun layihisi” ni bikar qilishini telep qildi. Bu, xongkongda yéqinqi bir hepte ichide partlighan 2‏-qétimliq zor kölemlik namayishtur. Chet'el taratqulirining ilgiri sürüshiche, bu xongkong tarixida partlighan adem sani eng köp bir qétimliq namayish iken. Xongkongda 9‏-iyun küni partlighan 1‏-qétimliq namayishqa bir milyon 300 mingdek adem qatnashqanidi. Saqchi terep yekshenbe künidiki namayishqa 338 ming adem qatnashqanliqini ilgiri sürgen bolsimu, lékin namayishni teshkilligüchiler uninggha 2 milyondek adem qatnashqanliqini bildürmekte.

B d t ning xewiride ilgiri sürülüshiche, “Kishilik hoquq fronti” namliq ammiwi guruhning mes'uli jimiy shi, yekshenbe küni muxbirlargha bayanat bérip, “Bügünki namayishqa 2 milyondek adem qatnashti” dégen. Xongkong walisi lin jényüy xelqning bésimida shenbe küni “Qachqunlarni ötküzüp bérish qanuni” ni muzakire qilishning toxtitilghanliqini élan qilghan, shuningdek yekshenbe küni mezkur qanun layihisi üchün kechürüm sorighan. Lékin namayishchilar yekshenbe küni qanun layihisining toxtitilishi yéterlik emesliki, uning pütünley bikar qilinishi we xongkong waliysining istépa bérishini telep qilghan.

Xongkong waliysi lin jényüning “Qachqunlarni ötküzüp bérish qanun layihisi” teyyarlap, xongkong parlaméntigha sunushi xongkong xelqide qattiq endishe qozghap, bu qétimqi namayishning partlishigha seweb bolghan. Xongkongluqlarning ilgiri sürüshiche, bu qanun xongkongning démokratiye we edliye musteqilliqigha buzghunchiliq qilip, uni xitayning adettikidek bir ölkisige aylandurup qoyidiken.

Xongkong xelqining naraziliq namayishi xelq'arada zor qollashqa érishken. D u q bayanat élan qilip, xongkong xelqini qollaydighanliqi, ulargha hemdemde bolidighanliqi, xongkong xelqining “Erkinliki we hoquqini qoghdash üchün keng kölemlik heriketke ötkenlikidin ilhamlan'ghanliqi” ni bildürgen idi. Melum bolushiche, 16‏-iyundiki namayishta héchqandaq toqunush yüz bermigen. Namayishchilar xongkong wiktoriye baghchisidin yolgha chiqip, parlaméntqa qeder yürüsh qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.