Хотән вилайити парихорлуқ вә чириклик билән җазаланған хитай әмәлдарлири әң көп чиққан вилайәтләрниң бири болуп қалған

Мухбиримиз қутлан
2017-01-07
Елхәт
Пикир
Share
Принт


28-Декабир күни қариқаш наһийәлик парткомға аптомобиллиқ һуҗум қилиш вәқәсиниң йүз бериши чен чвәнгониң тибәттә қолланған бир йүрүш идарә қилиш сиясәтлириниң уйғур елида ақмайдиғанлиқидин бишарәт бәрмәктә.

Хотән вилайити уйғурлар нопуси мутләқ үстүнлүкни игиләйдиған, уйғур ели бойичә вәзийити әң сәзгүр бир район болушиға қаримай, бу йәрдики йоқири қатлам хитай әмәлдарлири арисида «парихорлуқ», «чириклик» вә «интизамға еғир хилаплиқ қилиш» қилмишлири билән җазаланғанлар әң көп көрүлгән вилайәт болуп қалған.

Қарақашта вәқә йүз берип, аридин бир һәптә өтмәйла, хотән вилайәтлик парткомниң секритари җаң җинбяв билән қариқаш наһийәлик парткониң секритари ху җүн вәзиписидин елип ташланған.

Хитай мәркизи интизам тәкшүрүш комитетиниң бу һәқтә чиқарған уқтурушида хотәндики йоқири дәриҗилик бу икки нәпәр хитай әмәлдариниң «партийә интизамиға еғир дәриҗидә хилаплиқ қилғанлиқи вә хизмәт мәсулийитини яхши орундиялмиғанлиқи» үчүн вәзиписидин қалдурулғанлиқи вә тутуп туруп тәкшүрүливатқанлиқи билдүрүлгән.

Өткән йили 12-айниң ахири уйғур аптоном районлуқ интизам тәкшүрүш комитети уқтуруш чиқирип, хотән вилайәтлик мәмурий мәһкиминиң муавин валийси, қошумчә гума наһийәлик парткомниң секритари шен йиниң «интизамға еғир дәриҗидә хилаплиқ қилиш» җинайити билән тутуп туруп тәкшүрүливатқанлиқини билдүргән иди.

Ундин башқа, хитай таратқулири йәнә бу йил 4-айда хотән шәһәрлик парткомниң секритари чен йвәнхваниң «интизамға еғир дәриҗидә хилаплиқ қилиш» җинайити билән җазаланғанлиқини хәвәр қилған иди.

Муһаҗирәттики сиясий анализчилар, уйғур диярида дело турғузулуп тәкшүрүливатқан хитай әмәлдарлириниң «парихорлуқ» вә «чириклик» кә, әмма йәрлик уйғур әмәлдарларниң болса «сиясий мәйдан» мәсилисигә четиливатқанлиқини илгири сүрмәктә.

Пикирләр (0)
Share
Толуқ бәт