Xoten wilayiti muqimliqni ishqa ashurush üchün xitayche öginish herikiti qozghighan

Muxbirimiz irade
2017-09-12
Share

Xoten wilayiti "Muqimliqni ishqa ashurup, menggülük eminlikni berpa qilish" deydighan nishan'gha yétish üchün emdilikte wilayet teweside xitayche sözlesh we yézishni öginish herikiti qozghashni qarar qilghan.

"Xoten géziti" ning bu heqtiki xewiridin qarighanda, bu heriketke yéqindin buyan arqa-arqilap ochuq xet élan qilish we ammini qesem bérish yighinlirigha uyushturup xitay kompartiyisige sadaqitini ipadileshte özini körsitiwatqan xoten waliysi éziz musa yétekchilik qilidiken.

10-Séntebir küni u wilayette "Dölet tili qurulushigha heydekchilik qilish yighini" échip, "Dölet tili" dep atiliwatqan xitay tilini bilishning ehmiyitini tekitlep, uni menggülük eminlik berpa qilishning kapaliti, dep körsetken.

Yighinda chiqirilghan qarargha asasen, bundin kéyin herqaysi nahiyiler choqum bu heqtiki teshwiqat xizmetlirini qattiq kücheytip, choqum herbir az sanliq millet kadir we ishchi-xizmetchisining choqum MHK xitay tili sewiye imtihanigha qatnashturup, layaqetlik bolushigha kapaletlik qilishi, yéza kadirliri we déhqan-charwichi ammini bolsa dölet til-yéziq sewiyesini sinash imtihanigha orunlashturushi kérek iken.

Yighinda, bolupmu nahiye tewesidiki 45 yashtin töwen az sanliq millet kadir ishchi-xizmetchilirining xitay tili oqushigha orunlashturush we ularni 2018-yilining axirighiche xitay tili sewiye imtihanining ikkinchi a derijilik sewiyisige, 2019-yilining axirighiche ikkinchi b derijilik sewiyige yetküzüsh telep qilin'ghan.

Téxi yéqinda, Uyghur rayonluq ma'arip nazariti bu yilliq oqush mewsumidin bashlap Uyghur rayonidiki barliq toluqsiz ottura mekteplerning 1‏-yilliqlirigha we bashlan'ghuch mekteptiki yerlik millet oqughuchilirigha omumyüzlük xitay tilida ders ötüshni qarar qilip, ana tilda ders anglash, derslik matériyallirini ana tilda oqushqa xatime bergen idi. Xitay tilini asas qilghan "Qosh til yesli qurulushi" mu Uyghurlar eng zich olturaqlashqan jenubtiki üch wilayet bir oblastta qattiq élip bérilghan idi.

Chet'ellerdiki közetküchiler, xitay hökümitining Uyghur tilini yoq qilish üchün barliq amallarni ishqa séliwatqanliqini bildürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet