Хотәндин 19 милйон тоннилиқ запасқа игә қоғушун кани байқалди

Хотән вилайитидин записи зор қоғушун - синик кани байқалған болуп, хитай ахбарат васитилириниң ашкарилишичә, хотәндин байқалған мәзкур қоғушун - синик каниниң записи 19 милйон тонна әтрапида икән, шундақла бу хитай бойичә әң зор қоғушун - синик кани һесаблинидикән.

Бу кан йәнә запас миқдариниң адәттин ташқири зорлуқи билән дуня бойичә чоң қоғушун - синик канлири қатариға киридикән.

Шинхуа агентлиқиниң 25 - сентәбирдики хәвиридә көрситилишичә, мәзкур кан хотән наһийиси чегриси ичидики қарақурум теғи ичигә җайлашқан болуп, бу җайниң деңиз йүзидин егизлики 5500 метир, кан мәйданиниң көлими 6.6 Квадрат километир келиду. Мәзкур җайдин байқалған кан рудилири қелин, көмүлүшни тейиз болуп, қезиш асан икән, униң үстигә йәнә сүпитиму юқири һесаблинидикән.

Мәлумки, қоғушун - синик електир әсваблири, машинисазлиқ, ядро санаити, нефит - химийә санаити, һәрбий техника вә башқиларда көпрәк ишлитилиду.

Мәлум болушичә, йеқинқи йиллардин буян уйғур диярида йәр асти байлиқ мәнбәлирини қидирип тәкшүрүш ишлири тезләштүрүлгән болуп, бир қисим районлардин арқиму - арқидин йеңи кан мәнбәлири байқалған иди.

Шуниң билән бир вақитта йәнә уйғур районидики тәбиий газ, нефит вә көмүр ишләпчиқириш миқдариму йилдин йилға ашурулуп, буларниң “ғәрбниң нефитни шәрққә тошуш”, “ғәрбниң газини шәрққә тошуш” вә “ғәрбниң көмүрини шәрққә тошуш” программиси бойичә ичкири хитай тәрәққиятниң еһтияҗи үчүн тошуливатқанлиқи мәлум.