Tengritagh tori xotendiki weqelerde 3 yil ichide 23 saqchi ölüp, 64 saqchi yarilan'ghanliqini ashkarilidi

Uyghur rayonluq hökümetning axbarat orgini bolghan tengritagh tori bügünki xewiride, xotende yéqinqi üch yil ichide chiqqan weqelerde j x sahesining özidinla 23 neper saqchi ölgenliki we 64 saqchining yarilan'ghanliqini ashkarilidi.

Bu uchur bügün xoten shehirining gujanbagh yézisida ötküzülgen atalmish térrorgha qarshi küreshte qurban bolghanlarni xatirilesh murasimi ötküzülgenliki heqqidiki xewerde tilgha élindi. Xewerde yene, xotende nöwette 160 inqilabiy qurbanning yerliki barliqi, yéqinda xotende mexsus inqilabiy qurbanlar qebristanliqini tesis qilidighanliqi tilgha élin'ghan. Emma, bu 160 qurbanning kimliki, qachan, qeyerde ölgenliki bayan qilinmighan. Xewerde déyilishiche, bügünki bu atalmish inqilabiy qurbanlarni xatirilesh murasimi gujanbagh yézisining rok kentide ötküzülgen.

Murasimgha xitay qoralliq qisimliri we wilayet tewesidiki emeldarlar, ishchi-xizmetchiler we ammidin bolup minglarche kishi qatnashturulghan. Murasimda, atalmish inqilabiy qurbanlardin ilgiri nami ashkarilan'ghan gheyret mamuttin bashqa, mutellip ömer, féng chéngshéng, batur tursun, memet emer we fen yünyung qatarliq namelum isimlar tilgha élin'ghan. Xewerde murasimining néme üchün gujanbaghning rok kentide ötküzülgenliki, yeni bu kentning ölgüchilerdin bireri bilen alaqisi bar-yoqluqi eskertilmigen.

Xitay da'iriliri yillardin béri, atalmish térrorluqqa qarshi heriketliride ölgen saqchi xadimlirining isimlikini axbarattin yoshurun tutup kelmekte, bularning bir qismi peqet mana mushundaq matem yaki mukapatlash murasimliridila ashkarilinip qalmaqta.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar