Xitay da'iriliri xotenning mu'awin walisi ghalip ablimitni tutqun qilghan

Xitay da'iriliri xoten wilayitining mu'awin walisi ghalip ablimitni siyasiy intizam we siyasiy qa'ide-tüzümge éghir xilapliq qilish bilen eyiblep qolgha alghan.

Xitay merkizi intizam tekshürüsh we réwiziye komitétining 19‏-iyul ashkarilishiche, Uyghur aptonom rayonluq intizam tekshürüsh komitéti ghalip ablimitni tekshürüp, uning siyasiy intizam we siyasiy qa'ide xilapliq qilghanliqi, ghayisi we siyasiy meydanini yoqatqanliqi, teshkilning tekshürüshige qarshiliq qilghanliqi, haram pul yötkigenliki, intizamgha we qanun'gha xilap qilmishlirini yoshurghanliqini ilgiri sürgen.

Ghalip ablimit xitay kompartiyesi 2017‏-yili “Ikki yüzlimichiler” ni qézip chiqish herikiti qozghighan, shuningdek bu yilning axirlirida bashlighan “Qara guruhlar we rezil küchler” ge zerbe bérish heriketliride siyasiy intizamgha xilapliq qilish bilen eyiblinip tutqun qilin'ghan yuqiri derijilik Uyghur emeldarlirining biridur. Lékin, xitay merkizi intizam tekshürüsh we réwiziye komitétining torida élan qilin'ghan uchurida, ghalip ablimitning siyasiy intizam we qanun'gha konkrét qandaq xilapliq qilghanliqi, uning qeyerge haram pul yötkigenliki tilgha élinmighan.

Xitay hökümiti 2017‏-yili bashlighan 2 milyondek Uyghur we bashqilarni tutqun qilip, Uyghur jem'iyitige qarita omumyüzlük digital nazaret qilishni yolgha qoyushta Uyghur kadirlar uning zerbe bérish nishanlirining birige aylan'ghan. Xiyanetchilik, parixorluq we siyasiy intizamgha xilapliq qilish bilen eyiblesh uning Uyghur kadirlirini tutqun qilishidiki asasliq usuli bolup qalghanidi.

Xitay merkizi intizam tekshürüsh komitétining uchurida qeyt qilinishiche, da'iriler tekshürüsh arqiliq ghalip ablimitni partiyedin qoghlap chiqirishni, wezipisidin élip tashlashni we délo turghuzup, teptish organlirining bir terep qilishigha tapshurup bérishni qarar qilghan.

Dunya Uyghur qurultiyi bayanatchisi dilshat rishit jüme küni radiyomizgha bergen bayanatida, xitay da'irilirining “Siyasiy intizamgha, siyasiy qa'idige xilapliq qilish, siyasiy meydanini yoqitip qoyush, dégendek bu eyibleshlerni ishlitip, Uyghur kadirlirini wehime ichide yashaydighan tirik murdilargha aylandurup qoyuwatqanliqi” ni bildürdi.