Чен чүәнго хотәндә муқимлиқ хизмитини вә милләтләрниң юғурулушини күчәйтишни тәкитлигән

Мухбиримиз ирадә
2019-08-22
Елхәт
Пикир
Share
Принт

Уйғур аптоном районлуқ парткомниң секретари чен чүәнго йеқинда хотән вилайитидә тәкшүрүштә болуп, иҗтимаий муқимлиқ вә әбәдий әминлик баш нишанини йәниму чоңқур әмәлийләштүрүшни тәкитлигән.

Тәңритағ ториниң бу һәқтики хәвиридин қариғанда, чен чүәнго хотән вилайитидә 8-айниң 20-күнидин 21-күнигичә қилған зияритидә мәзгилидә хотән наһийәсидә 10 миңдин ошуқ кишиниң ишик алдида хизмәткә орунлишишиға шараит яритип бәргәнлики илгири сүрүлүватқан қара мор пишшиқлап ишләш завути вә йәнә долан кийим-кечәк пишшиқлаш завутлирини зиярәт қилған. Һалбуки, бундақ завутлар чәтәлләрдики ахбарат васитилири тәрипидин лагердики уйғурлар мәҗбурий әмгәккә селиниватқан орунлар, дәп талаш-тартиш қилинмақта.

Чен чүәнго зиярити мәзгилидә йәнә асасий қатламдики кадирларни вә йәнә хотән шәһири илчи йезисидики топча мәсчитиниму зиярәт қилған. У хотәнниң муқимлиқ вә хизмәтлиридә қолға кәлтүргән нәтиҗилирини муәййәнләштүрүш билән биргә муқимлиқ хизмитини йәниму күчәйтиш, «бирикмә мушт» ни йәниму чиң етиш арқилиқ җуңхуа хәлқ җумһурийити қурулғанлиқиниң 70 йиллиқини тәбрикләш керәкликини билдүргән.

Хәвәрдин қариғанда, чен чүәнго йәнә милләтләр ара юғурулуш мәсилисиниму алаһидә тәкитлигән болуп, у «милләтләр иттипақлишип бир аилә кишилиридәк болуш» вә милләтләр иттипақлиқи бирләшмә достлуқ паалийитини пухта қанат яйдуруп, милләтләрниң алақилишиши, алмаштуруши, юғурулушини күчәйтип, анарниң данисидәк зич уюшуш керәк. . . Динни сотсиялизм җәмийитигә уйғунлаштурушқа паал йетәкләш керәк» дегән.

Чен чөәнгониң хитай дөләт ишлар кабинети ахбарат ишханиси «шинҗаңдики кәспий маһарәт тәлим-тәрбийә хизмити» намлиқ ақ ташлиқ китаб елан қилғандин кейинла уйғурларниң нопуси әң зич болған вә лагерға қамалған киши сани әң юқири болған хотән вилайитини зиярәт қилиши диққәт қозғимақта.

Хитай һөкүмити ақ ташлиқ китабида бу аталмиш «кәспий маһарәт билән тәлим-тәрбийә хизмити», йәни «қайта тәрбийә лагерлири» яки «йиғивелиш лагерлири» қурушниң нәзәрийәви вә қануний асасқа игә икәнликини илгири сүргән шундақла уни хәлқаралиқ террорлуқни вә радикаллиқни йоқитиштики муһим тәҗрибә, дегән иди.

Пикирләр (0)
Share
Толуқ бәт