Chén chüen'go xotende muqimliq xizmitini we milletlerning yughurulushini kücheytishni tekitligen

Muxbirimiz irade
2019-08-22
Élxet
Pikir
Share
Print

Uyghur aptonom rayonluq partkomning sékrétari chén chüen'go yéqinda xoten wilayitide tekshürüshte bolup, ijtima'iy muqimliq we ebediy eminlik bash nishanini yenimu chongqur emeliyleshtürüshni tekitligen.

Tengritagh torining bu heqtiki xewiridin qarighanda, chén chüen'go xoten wilayitide 8-ayning 20-künidin 21-künigiche qilghan ziyaritide mezgilide xoten nahiyeside 10 mingdin oshuq kishining ishik aldida xizmetke orunlishishigha shara'it yaritip bergenliki ilgiri sürülüwatqan qara mor pishshiqlap ishlesh zawuti we yene dolan kiyim-kéchek pishshiqlash zawutlirini ziyaret qilghan. Halbuki, bundaq zawutlar chet'ellerdiki axbarat wasitiliri teripidin lagérdiki Uyghurlar mejburiy emgekke séliniwatqan orunlar, dep talash-tartish qilinmaqta.

Chén chüen'go ziyariti mezgilide yene asasiy qatlamdiki kadirlarni we yene xoten shehiri ilchi yézisidiki topcha meschitinimu ziyaret qilghan. U xotenning muqimliq we xizmetliride qolgha keltürgen netijilirini mu'eyyenleshtürüsh bilen birge muqimliq xizmitini yenimu kücheytish, "Birikme musht" ni yenimu ching étish arqiliq jungxu'a xelq jumhuriyiti qurulghanliqining 70 yilliqini tebriklesh kéreklikini bildürgen.

Xewerdin qarighanda, chén chüen'go yene milletler ara yughurulush mesilisinimu alahide tekitligen bolup, u "Milletler ittipaqliship bir a'ile kishiliridek bolush" we milletler ittipaqliqi birleshme dostluq pa'aliyitini puxta qanat yaydurup, milletlerning alaqilishishi, almashturushi, yughurulushini kücheytip, anarning danisidek zich uyushush kérek. . . Dinni sotsiyalizm jem'iyitige uyghunlashturushqa pa'al yéteklesh kérek" dégen.

Chén chöen'goning xitay dölet ishlar kabinéti axbarat ishxanisi "Shinjangdiki kespiy maharet telim-terbiye xizmiti" namliq aq tashliq kitab élan qilghandin kéyinla Uyghurlarning nopusi eng zich bolghan we lagérgha qamalghan kishi sani eng yuqiri bolghan xoten wilayitini ziyaret qilishi diqqet qozghimaqta.

Xitay hökümiti aq tashliq kitabida bu atalmish "Kespiy maharet bilen telim-terbiye xizmiti", yeni "Qayta terbiye lagérliri" yaki "Yighiwélish lagérliri" qurushning nezeriyewi we qanuniy asasqa ige ikenlikini ilgiri sürgen shundaqla uni xelq'araliq térrorluqni we radikalliqni yoqitishtiki muhim tejribe, dégen idi.

Toluq bet