Yaponiye xu'awéy we jongshing shirketlirining mehsulatlirini hökümet organlirida ishlitishni chekligen

Muxbirimiz erkin
2018-12-10
Share

Yaponiye hökümiti düshenbe küni hökümet tarmaqlirigha buyruq chüshürüp, xitayning xu'awéy we jongshing qatarliq téxnologiye shirketliri bilen soda toxtami tüzüshni we ularning mehsulatlirini ishlitishini chekligen.

"Washin'gton pochtisi" ning ilgiri sürüshiche, bu xitayning xu'awéy shirkitige nisbeten yene bir qétimliq zor ongushsizliq hésablinidiken. Kanada 2‏-dékabir küni amérika hökümitining telipige bina'en xu'awéy shirkitining bash boghaltiri we mu'awin bash mudiri ming wenjoni qolgha alghan. Ming wenjo amérikining iran'gha yürgüzgen émbargosigha xilapliq qilish bilen eyiblen'gen idi.

Yaponiye "Nikkéy géziti" ning xewer qilishiche, yaponiye hökümiti sezgür uchurlarning pash bolup kétishidin saqlinish üchün yuqiriqi qararni chiqarghan. Xewerde yaponiyening cheklesh qararida yuqiriqi ikki shirketning ismi ashkara tilgha élinmighan bolsimu, lékin bu qararning shulargha qaritilghanliqini bildürgen. Xewerde bayan qilinishiche, cheklesh qarari yuqiriqi ikki shirket ishlepchiqarghan kompyutér, mulazimétir we éléktronluq alaqe eswabliri qatarliq mehsulatlirini öz ichige alghan bolup, uningda hökümet tarmaqliri we qoghdinish qisimlirining bu mehsulatlarni ishlitishi cheklen'gen. Xewerde yaponiye hökümitining xitayning bu mehsulatlargha wirus yüklen'gen bolushi mumkin dégen endishe bilen yuqiriqi qararni chiqarghanliqi ilgiri sürülgen. Buning aldida awstraliye bilen yéngi zélandiye hökümetlirimu xu'awéy shirkitining 5G intérnét qurulushigha qatnishishini tosighan idi.

Yaponiye hökümet tarmaqlirida xitayning xu'awéy we jongshing shirketlirining mehsulatlirini ishlitishni chekligen 2‏-dölet. Uningdin burun, yeni bu yilning bashlirida amérika dölet mejlisi qanun maqullap, amérika hökümet tarmaqlirining yuqiriqi ikki shirketning mehsulatini ishlitishige chek qoyghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet