Jilin ölkisi ahalilirige yadro urushining zexmisidin saqlinish tedbirliri ögitilgen

Xitayning “Jilin kündilik géziti” bügün bir maqale élan qilip atom bombisi tashlan'ghan yaki partlighan ehwalda ahalilerning néme qilishi kérekliki heqqide tepsiliy melumat bergen.

Bu xewer xitayning herqaysi chong-kichik axbarat wasitiliride bes- beste köchürüp tarqitilghan we jem'iyette keng wehime peyda qilghan.

Xelq'a'ara xewerlerde déyilishiche, “Jilin kündilik géziti” mezkur maqaliside, yadro urush yüz berse awwal yoruqluq qaplash, zilzile peyda bolush we tuman bésish qatarliq alametler körülidighanliqini eskertken.

Maqalida yene ahalilerni urush alamiti körülgende öyde bolsa üstel we kariwatning astigha kiriwélish, hoylida bolsa origha kiriwélish, derya we kölge yéqin bolsa özlirini sugha étish qatarliq tedbirler bilen qoghdinishqa dewet qilghan.
Patparaqchiliqning aldini élish üchün xitayning “Yershari waqti” géziti bügün bu heqte maqale élan qilip, bir tereptin nöwettiki koréye arili weziyitining xeterlik basquchta ikenlikini izahlisa ؛ yene bir tereptin, xitaygha qarita éhtimal bir atom bomba hujumning yoqluqini tilgha élip ahalilerni jiddiyleshmeslikke chaqirghan.

Royturusning xewer qilishiche, amérika we jenubiy koréye birlikte élip baridighan keng-kölemlik maniwérning bir parchisi süpitide bügün yeni charshenbe küni amérika bombardimanchi ayriplanliri küréye arili üstide uchush élip baridiken.