"хитай йәр шари телевизийә қанили" үч әлчини зиярәт қилип, уйғур районидики вәзийәт һәққидә ялған тәшвиқат елип барған

Мухбиримиз җәвлан
2021-04-27
Share

"хитай йәршари телевизийә қанили" ториниң 27-апрел чиқарған видийолуқ хәвиригә қариғанда, мәзкур телевизийә қанилиниң риясәтчиси лю шин пакистан, пәләстин вә сүрийәниң хитайда турушлуқ әлчилирини тәклип қилип, уларни уйғур районида көргән билгәнлири һәққидә сөзләткән.

Бу программиниң астидики чүшәндүрүштә, йеқиндин бери көплигән хәлқаралиқ өмәк вә дипломатларниң уйғур райониға берип "әмәлий тәкшүрүш" тә болғанлиқи, көплигән ғәрб сиясийонлири вә таратқулириниң "шинҗаңдики аз санлиқ милләтләрниң иқтисад, мәдәнийәт вә иҗтимаий һоқуқлардин бәһримән болуватқанлиқини қәстән көрмәскә селиватқанлиқи", шинҗаңда тәкшүрүштә болған бу үч дипломатниң ағзидин гәп аңлиса уларниң каллисида "йеңи чүшәнчә" шәкиллинидиғанлиқи билдүрүлгән болуп, хитайниң қайси мәқсәттә бу тәшвиқатни елип бериватқанлиқи рошән көрситилгән.

Хитайниң орунлаштуруши бойичә уйғур районида "тәкшүрүштә болған" пакистан әлчиси муин улһәқ, пәләстин әлчиси фәрз мәһдави, сүрийә әлчиси имад мустафа қатарлиқлар риясәтчи лю шинниң сориған соаллириға тамамән хитайниң үмид қилғинидәк җаваб бәргән болуп, һәммиси дегүдәк уйғур райониниң тәрәққиятидин зоқланғанлиқи, "хитайниң дуняви тәрәққиятиниң бу районда толуқ әкс әткәнлики, хәлқ турмушиниң нормаллиқи, мәсчит имамлири билән көрүшкәнлики вә мусулманларниң өз етиқади бойичә яшаватқанлиқи, өзлири көргән әһвалниң ғәрб мәтбуатлири дегәндәк әмәслики, ғәрб әллириниң әмәлийәттә хитайдики тәрәққиятни көрәлмәйватқанлиқи…" дегәнләрни баян қилған.

Көзәткүчиләрниң қаришичә, пакистан, пәләстин, сүрийә дегәндәк дөләтләр хитайға беқинип қалған вә изчил хитайни қоллап келиватқан дөләтләр болуп, бу дөләтләрниң хитайдики әлчилириму тамамән өз дөлитиниң мәйданиға вәкиллик қилиду вә хитайниң мәнпәәти үчүн хизмәт қилиду. Хитай һөкүмити уларни пиланлиқ орунлаштуруп көз боямчилиқ қилиду, яхши күтүп йолға салиду вә арқидин телевизорға чиқирип сөзлитиду. Хитай бу арқилиқ хәлқараниң уйғур мәсилисигә болған пикир йөнилишини бурмилашқа урунған тәқдирдиму, ғәрб әллиридә униң үнүми чағлиқ. Хитайниң мәқсити мусулман әлләрни бихутлуқта қалдуруш болуп, бу видийо арқилиқ хитайға ишинишни халайдиғанларни техиму ишәндүриду вә уларни ғәрб таратқулириға ишәнмәсликкә чақириду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт