Dunya Uyghur qurultiyi xitayning yene bir yalghan xewirige qarshi bayanat élan qildi

Muxbirimiz shöhret hoshur
2018-04-04
Élxet
Pikir
Share
Print

Xitayning pakistanda chiqiriwatqan TNI, yeni "Xelq'ara xewer tori" tünügün xitay-pakistan hemkarliqi heqqide bir xewer élan qilghan.

Xewerde ikki terepning pakistandiki xitay qurulush eslihelirini qoghdash üchün atalmish "Sherqiy türkistan térrorchiliri" gha éghir zerbe bergenliki bayan qilin'ghan. Xewerde dolqun eysa, ömer qanat, ablimit tursun, abduqadir yapchan qatarliq on nechche Uyghur pa'aliyetchining nami tilgha élinip, ularning tutulup xitaygha qaturulup bérilgenliki yaki öltürülgenliki ilgiri sürülgen.

Dunya Uyghur qurultiyi bügün buninggha derhal inkas qayturup, dunya Uyghur qurultiyining re'isi dolqun eysa bilen qurultay ijra'iye komitétining re'isi ömer qanatning nöwette yaponiyede pa'aliyet élip bériwatqanliqini bayan qildi we xitay terepni yillardin béri dawam qilip kéliwatqan Uyghur pa'aliyetchiliri üstidiki töhmetlirini toxtitishqa chaqirdi.

Xitayning Uyghurlarning heqqaniy heq-hoquq küreshlirini térrorluqqa baghlap teshwiq qilip kéliwatqanliqi eyiblen'gen bu bayanatta, xitayning bu qétimqi xewiriningmu xuddi ilgirikilirige oxshash bashtin-axir oydurma pakitlar bilen toqulghanliqi deliller bilen körsitilgen. Pa'aliyetchi abduqadir yapchanning nöwette türkiyede, ablimit tursunning bolsa gérmaniyede ikenliki tilgha élin'ghan bayanatta, xelq'ara jama'etchilikni xitayning tashqi dunyada barghanséri kéngeytiwatqan mushu xil saxta teshwiqatlirigha aldanmasliqqa chaqiriq qilin'ghan.

Bayanatta xitayning bu xildiki saxta teshwiqatining yéqinqi aylardin béri yene kücheygenliki, xitayning bu arqiliq nöwette Uyghur élida dawam qiliwatqan éghir we paji'elik weziyetni perdazlashqa urunuwatqanliqi tekitlen'gen. Bayanatta yene xitayning dolqun eysagha yuqiriqigha oxshash yalghan pakitlar bilen "Térrorchi" qalpiqi kiydürüp xelq'ara jama'etni 20 yil aldighanliqi we dolqun eysaning pa'aliyetlirige köp awarichilikler tughdurghanliqi eskertilgen.

Toluq bet