Yaponiyening awiyamatkisini yéngilishi xitayni endishilendürgen

Washin'gtondin muxbirimiz uyghar teyyarlidi
2024.04.17

Amérikada chiqidighan “Heptilik xewerler” (News Week) torining xewirige qarighanda, yaponiyening yéqinda “Kaga” namliq awiyamatkisini yéngilap ishqa kirishtürüshi, hindi-tinch okyan rayonidiki her qaysi döletlerning diqqitini qozghighan, shundaqla yaponiyege qarita sezgür mu'amile qilidighan xitayni bi'aram qilghan.

“Kaga” namliq awiyamatkaning qayta yéngilinip yuqiri téxnikaliq üsküniler bilen seplinishi, yaponiye déngiz qisimlirining tereqqiyatidiki yéngi özgirishige wekillik qilidiken. Yaponiye yene “Izumu” (Izumo) namliq zor tiptiki herbiy paraxotinimu qayta özgertip yéngilashni pilanlighan. 2027-Yilgha barghanda, yaponiyening yuqiriqi her ikki paraxotida 12 küreshchi ayropilan we 16 tik uchar qonalaydighan haletke yétidiken.

 “Jenubiy xitay etigenlik géziti” ning xewirige asaslan'ghanda, yaponiye déngiz qisimlirining yéngi tereqqiyati, bolupmu herbiy téxnika sewiyesining örlishi we herbiy paraxotlirigha seplinidighan küreshchi ayropilan sanining köpiyishi xitayni endishilendürüshke bashlighan.

Ritsuméykan asiya-tinch okyan uniwérsitétining piroféssori yochiro sato (Yoichiro Sato) ependining bu heqtiki bahasigha qarighanda, “Kaga” namliq awiyamatkini xitay awiyamatkilirigha sélishturghanda, uninggha seplen'gen küreshchi ayropilanlarning sani az bolsimu, emma su asti paraxotigha qarshi hujum we mudapi'e qabiliyiti alahide yuqiri iken.

Mezkur xewerde déyilishiche, yaponiye déngiz qisimlirining tereqqiyatidiki bu yéngilinishlar asiya-tinch okyan rayonida barghanséri küchiyiwatqan xitayning herbiy kéngeymichilikige nisbeten melum agahlandurush rolini oynaydiken. Bolupmu yaponiye bilen xitay arisidiki ikkinchi dunya urushidin qalghan tarixi mesililer, shundaqla bügünki asiya-tinch okyan rayonining xewpsizlikige munasiwetlik istratégiyelik oylinishlar, xitay-yaponiye munasiwitige dawamliq tesir körsitidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.