Японийә баш вәзири 2 - дуня урушидики япон әскәрлириниң төһписини мәдһийәлигән

Мухбиримиз җүмә
2014.08.27
Share on WhatsApp
Share on WhatsApp

Мәлуматларға қариғанда, японийә баш вәзири шинзо абе 2 - дуня урушида өлгән япон хадимлирини хатириләш мурасимиға мәктуп йоллап, өлгән әскәрләрниң төһписини мәдһийәлигән.

Чаршәнбә күни японийә ички кабинети баш катипи йошиһиде суганиң мухбирларға ейтишичә, шинзо абе бу мәктупни бу йил 4 - айниң 29 - күни токйодики коясан ибадәтханисида өткүзүлгән бир хатириләш мурасими үчүн әвәткән.

Униң мәзкур мәктупи мурасимға қатнашқан 220 нәпәр мурасим әһлигә оқуп өтүлгән.

Бирләшмә агентлиқиниң нәқил қилишичә, шинзо абе хетидә: “кәминә бүгүнки японийәдики гүллиниш вә әминликниң асасиға айланған роһлирини қурбан қилған қәһриманлиримизға чоңқур тәзийә билдүримән” дәп язған.

У йәнә хетидә пүткүл инсанийәтниң мәңгүлүк тинчлиқта бирликтә мәвҗут болуп турушини үмид қилидиғанлиқини билдүргән.

2 - Дуня урушида өлгән япон һәрбийлирини хатириләш японийә вә 2 - дуня уруши мәзгилидә японийә бесивалған хитай қатарлиқ әлләрдә сәзгүр темиларниң бири болуп һесаблиниду.

Мәлум болушичә, шинзо абе өткән йилиму бу хил хатириләш мурасимиға юқириқи мәзмунда мәктуп йоллиған икән.

Японийә баш вәзириниң хитай қатарлиқ дөләтләр “уруш җинайәтчилири” дәп қарайдиған бу бир түркүм һәрбийлиригә һесдашлиқ қилиши илгириму хитай японийә - мунасивәтлирини бир нәччә қетим йирикләштүргән иди.

Нөвәттә хитайниң мәзкур мәктупқа нисбәтән қандақ инкас қайтурғанлиқи мәлум әмәс.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.