Amérika, awstraliye, en'gliye hökümetliri yaponiyeni özlirining dölet mudapi'e ittipaqigha kirgüzmekchi bolghan

Washin'gtondin muxbirimiz jewlan teyyarlidi
2024.04.09

Amérika, en'gliye we awstraliye xitayning hindu-tinch okyandiki herbiy küchi we ighwagerchilikige taqabil turush üchün, yaponiyeni AUKUS (awstraliye, en'gliye, amérika) ittipaqigha kirgüzüshni oylashmaqta iken.

“Ruytérs agéntliqi” ning 9-aprél küni bergen xewiride éytilishiche, amérika pirézidénti jow baydén 4-ayning 10-küni washin'gtonda yaponiye bash weziri fumiyo kishida (Fumio Kishida) bilen körüshkende, hindu-tinch okyan rayonining xewpsizlikini qoghdash hemde yaponiyening AUKUS qa qétilish mesilisini muzakire qilidiken.

Amérika, en'gliye we awstraliye hökümetliri 8-aprél küni birlikte élan qilghan bayanatta éytilishiche, AUKUS kélishimining birinchi basquchida amérika awstraliyege yadroluq su asti paraxoti teminleydiken, emma yaponiye hazirche buninggha kirmeydiken. Halbuki, kélishimning ikkinchi basquchida, bu ittipaqqa qétilghan döletler kuwantumluq hésablash, awazdin yuqiri tézlik, sün'iy eqil we tor téxnikisi sahesidiki küchi we iqtidarini ittipaqdashlarning ortaq paydilinishigha sunidiken.

Üch dölet birlikte élan qilghan bayanatta mundaq déyilgen: “Yaponiyening téxnika ewzelliki we bu üch dölet bilen bolghan dölet mudapi'e hemkarliqini nezerde tutup, yaponiyeni AUKUS ning ikkinchi basquchtiki ilghar téxnika qurulushigha kirgüzüshni oylishiwatimiz”.

Xewerde körsitilishiche, amérika, en'gliye we awstraliye ittipaqi (AUKUS) xélidin béri bashqa döletlerni ikkinchi basquchtiki téxnika hemkarliqigha kirgüzüshni oylishiwatqan bolup, téxnikida yéngiliq yaritish, meblegh jughlash, sana'et ewzellikini saqlash, sezgür sanliq melumat we uchurlarni qoghdash iqtidarini hazirlash arqiliq hindu-tinch okyan rayonining muqimliqi we tinchliqini qoghdashni asasiy meqset qilghan. Xitay terep bolsa AUKUS kélishimini nahayiti xeterlik dep qarighan hemde uni “Rayondiki herbiy teyyarliq musabiqisini keltürüp chiqiridu” dep agahlandurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.