Yaponiyening herbiy xamchotni köpeytishi xitayni qattiq endishige salghan

Xitay yaponiyening herbiy xam chotni köpeytish pilanigha inkas bildürüp, uning bu pilanigha qarshi ikenliki, buning asiya we dunyada chongqur ensizlik peyda qilidighanliqini bildürgen.

Yéqinda yaponiye bash weziri shinzo abé herbiy xam chotni 8.0 Pirsent östürüp, 51 milyard 700 milyon dollargha yetküzidighanliqi, yéqinqi 5 yil ichide her yili 8.0 Pirsent östürüp mangidighanliqini élan qilghan idi. Bu yaponiyening yéqinqi 11 yil ichide tunji qétim herbiy xam chotni östürüshidur.

Xitay hökümiti qarshi turghan bolsimu, biraq bu san xitayning hazirqi 107 milyard dollarliq herbiy xam chotigha nisbeten yenila köp az.

Xitay yéqinqi on nechche yildin buyan özining herbiy xam chotini dawamliq östürüp, hazirqi yüz nechche milyard dollargha yetküzgen. Lékin amérika dölet mudapi'e ministirliqining ilgiri sürüshiche, xitayning emeliyettiki herbiy xam choti u élan qilghandin köp artuq.

Xitay dölet mudapi'e ministirliqi bayanatida, yaponiye “Özini tinchliqperwer” dep süretlep, dawamliq mudapi'e siyasiti yürgüzidighanliqini tekitlisimu, biraq uning aktip mudapi'e siyasiti yürgüzüshke qarap kétiwatqanliqini eskertip, yaponiye herbiy bixeterlik siyasiti zadi qayaqqa qarap kétip baridu? bu asiya we dunyaning jiddiy endishisini qozghimay qalmaydu, dégen.

Lékin, yaponiye axbaratining ilgiri sürüshiche, xitayning herbiy tehditi, uning sénkaku arili mesiliside oshuqluq qilishi yaponiyeni özining herbiy bixeterliki heqqide jiddiy oylishishqa mejbur qilghan.