Yaponiye sirtqa qarita küreshchi ayropilan éksport qilmaqchi

BBC Ning 26-marttiki xewiride éytilishiche, yaponiye herbiy da'iriliri en'gliye we italiye bilen birlikte tetqiq qilip yasap chiqqan eng yéngi küreshchi ayropilanlarni yaponiye bilen mudapi'e hemkarliqi kélishimi imzalighan bashqa döletlerge sétishqa ijazet alghan. Yaponiye parlaménti bu xil qoral éksportini maqullighan bolup, bu yaponiyening tinchliq qanunidiki halitining özgirishi hésablinidiken.

Xewerde éytilishiche, ikkinchi dunya urushidin kéyin yaponiye asasiy qanunida yaponiyening urushqa arilishishi men'i qilin'ghan. Emma yéqindin buyan xitay we shimaliy koréyedin kéliwatqan herbiy tehditler éship méngiwatqanliqi üchün, yaponiye parlaménti 2027-yiligha barghanda herbiy xirajetni bir qatlashni telep qilishqa bashlighan. Nöwettiki küreshchi ayropilan éksportigha ijazet bérishmu bu xil yüzlinishning bir muhim mezmuni iken.

Melum bolushiche, bu yéngi küreshchi ayropilanlar 2035-yili uchidighan bolup, yaponiye bash weziri fumi'o kishida (Fumio Kishida) ning aprél éyidiki amérika sepiri harpisida bu ijazet testiqlan'ghan. U bu heqte söz qilip “Herbiy ayropilanlarni üchinchi bir döletke éksport qilish yaponiyening xelq'ara mudapi'e sistémisidiki ishenchlik derijisini saqlishida muhim we zörür” dégen.