Erfiye éri yaponiye siyasi sahesige yürüsh qilghan tunji Uyghur bolup qaldi

Muxbirimiz eziz
2022.06.02
Share on WhatsApp
Share on WhatsApp

Yéqinqi yillarda muhajirette tughulup chong boluwatqan Uyghur yashlirining her sahede qolgha keltürgen muweppeqiyetliri oxshimighan shekillerde eks étiwatqan bolup, yaponiyediki Uyghur qizi erfiye éri (Eri Arfiya ) özini siyasiy sahede sinap baqmaqchi boluwatqan yashlarning biridur.

1988-Yili yaponiyening fukuka nahiyiside tughulghan erfiye éri kichikidin yaponiye ma'aripida terbiye alghanliqigha qarimastin Uyghurche, xitayche we én'glizche tillarni yaxshi ögen'gen. Kéyinche washin'gton shehiridiki jorji tawn uniwérsitétida xelq'ara munasiwet we xelq'ara siyaset kespi boyiche oqughan. Bu jeryanda türlük oqughuchilar uyushmisi we puqrawiy jem'iyetlerde özining teshkillesh qabiliyitini jari qildurup, türlük mes'ul wezipilerni üstige alghan. Oqush püttürgendin kéyin u washin'gtondiki xelqa'ara siyaset tetqiqat merkizi, dunya bankisi, yaponiyening birleshken döletler teshkilatida da'imiy turushluq ish béjirish orni qatarliq jaylarda ishligen iken.

Yéqinda u yaponiye parlaméntida sénatorluq orni üchün bolidighan saylam pa'alyitige qatnishidighanliqini jakarlap, her sahe zatlirining qizghin alqishigha érishken. Shundaqla bu sahege qedem tashlighan tunji Uyghur bolup qalghan.

Uning tiwéttér bétige chaplan'ghan uchurlarda éytilishiche, erfiye éri b d t diki xizmitini axirlashturup yaponiyege qaytip kelgen hemde yaponiyediki eng asasliq partiyelerdin bolghan erkin démokratlar partiyesi sahibxanliq qilghan muxbirlarni kütüwélish yighinida özining bu qétimliq sénatorluq saylimigha qatnishidighanliqini bildürgen. U qisqa nutuqida a'ile kechürmishlirige birleshtürgen halda özining yaponiye üchün xizmet qilish arzusining türtkisde bu qarargha kelgenlikini tekiligen. U bu heqte söz qilip: “Men bir yaponiyelik Uyghur. Xelq'arada hazir yaponiyege wekillik qilidighan ayal tenherketchiler, yaponiyege wekillik qilidighan yashlar anche köp emes. Men mushu boshluqni azraq bolsimu toldurushqa özümni atimaqchimen,” dégen.

Uning bu qétimliq saylam riqabitige qatnishidighanliqi melum bolghandin kéyin, her sahediki kishiler özlirining uninggha bolghan ishenchini, shuningdek tengsiz mu'amilige uchrawatqan bir milletning perzentidiki bu xil shija'etni qollaydighanliqini bildürüp uchur yollighan.

Melum bolushiche, awstraliyediki Uyghur qizi inti ilham (Inty Elham) mu ötken yillardin bashlap awstraliye siyasiy sahesige yürüsh qiliwatqan bolup, bu tirishchanliqlarning qandaq netije bérishidin qet'iynezer, ulardiki bu jür'et Uyghur milliy rohining ölmeydighanliqining simwoli, dep qaralmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.