Дуня уйғур қурултийи японийәни б д т да хитайни җавабкарлиққа тартишқа чақирған

Мухбиримиз әркин
2022.09.26
Share on WhatsApp
Share on WhatsApp

Дуня уйғур қурултийи японийә һөкүмитини б д т да һәқиқий вә конкирет һәрикәт қоллинип, б д т кишилик һоқуқ комиссарияти ишханисиниң уйғурлар һәққидики доклатиға инкас билдүрүшкә, хитайниң уйғурларға қаратқан дәпсәндичиликини җавабкарлиққа тартишқа чақирған.

Чақириқта “японийә һөкүмитиниң (хитайни) җавабкарлиққа тартиши, уйғур қурбанлириниң адаләткә еришишигә капаләтлик қилиши үчүн конкирет тиришчанлиқ көрситиши” тәләп қилинған. Чақириқта йәнә японийәниң асия, тинч ‍окян районидики кишилик һоқуқ вә демократийәни алға сүрүштә әң тәсир күчкә игә болған бир дөләт болуш сүпитидә “бу қиммәт қаришида чиң туруши, җүмлидин хитай һөкүмитигә қарши чиң туруши” илтиҗа қилинған.

Чақириқта “японийә һөкүмитиниң хитай һөкүмитиниң җинайи җавабкарлиқини сүрүштүрүш йолидики һазирқи вә кәлгүсидики һәрикәтләрни қоллиши” ни, буниң б д т да мәхсус муназирә елип берип, шәрқий түркистан вәзийитини назарәт қилидиған мустәқил тәкшүрүш комитети қурушни өз ичигә елишини тәләп қилған. Бу чақириқ дуня уйғур қурултийиниң рәиси долқун әйса башчилиқидики 4 кишилик бир ‍өмәк японийәни зиярәткә қилишқа башлиған, шундақла американиң муавин президенти камала харрис башчилиқидики бир америка һөкүмәт вәкилләр өмики мәрһум сабиқ баш вәзир шинзу абениң дөләтлик тәзийә мурасимиға қатнишиш үчүн японийәгә йетип кәлгән бир вақитта елан қилинған. Ройтерс агентлиқиниң хәвәр қилишичә, муавин президент камала харрис билән японийә баш вәзири фумио кишида 26-сентәбир көрүшүп, хитайниң тәйвән боғузидики һәркитини әйиблигән.

Һалбуки, мәзкур сөһбәттә тәрәпләрниң уйғур мәсилисини тилға алған-алмиғанлиқи мәлум әмәс. Ақсарайниң баянатида камала харрис билән кишиданиң “хитай хәлқ җумһурийитиниң тәйвән боғузидики йеқинқи иғвагәрчилик вә мәсулийәтсизликини музакирә қилғанлиқи” ни, “тәйвән боғузиниң тинчлиқи вә муқимлиқини қоғдашниң муһимлиқини қайта тәкитлигәнлики” ни билдүргән. Ройтерс агентлиқиниң ейтишичә, камала харрис йәнә американиң японийәни қоғдаш вәдисиниму қайта тәкитлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.