Kishilik hoquqni közitish teshkilati yaponiye hökümitini Uyghur mejburiy emgikini cheklesh chaqiriqigha qulaq sélishqa chaqirdi

Washin'gtondin muxbirimiz erkin teyyarlidi
2024.03.22

Kishilik hoquqni közitish teshkilati yaponiye hökümitini yaponiye parlamént ezalirining chaqiriqigha qulaq sélip, aptomobil ishlepchiqarghuchilirining Uyghur diyaridiki mejburiy emgek bilen bolghan alaqisini tekshürüshini telep qilghan.

Yaponiye parlaméntining hakimiyet béshi we hakimiyet sirtidiki partiyelerge mensup bolghan bir guruppa ezasi ötken yilning axirlirida chaqiriq élan qilip, yaponiye hökümitidin aptomobil ishlepchiqarghuchilarning Uyghur diyaridiki alyumin sana'itide mewjut Uyghur mejburiy emgiki bilen bolghan munasiwitini tekshürüshni telep qilghan. Yaponiye parlamént ezalirining chaqiriqi kishilik hoquqni közitish teshkilatining 2023-yili 10-ayda élan qilin'ghan doklatidin kéyin otturigha qoyulghan.

Kishilik hoquqni közitish teshkilati shu qétimliq doklatida, Uyghur diyarining alyumin sana'itide Uyghur mejburiy emgikining ishlitilidighanliqi, toyotani öz ichige alghan dangliq aptomobil shirketlirining dawamliq Uyghur mejburiy emgikige arilashqan alyumin mehsulatlirini ishlitiwatqanliqini bildürgen idi. Kishilik hoquqni közitish teshkilati asiya bölümining pirogramma diréktori tépéy kasay 19-mart élan qilghan chaqiriqida, yaponiye hökümitini parlamént ezalirining chaqiriqigha qulaq sélip, tézdin kishilik hoquq hoshyarliq qanuni we kishilik hoquq jaza qanunlirini maqullashqa chaqirghan. Melum bolushiche, yaponiye aptomobil ishlepchiqarghuchilirining Uyghur diyarining alyumin sana'iti bilen bolghan alaqisini tekshürüsh chaqiriqi yaponiye parlaméntida 2021-yili qurulghan “Parlamént kishilik hoquq diplomatiyesini qayta oylishish jem'iyiti” teripidin otturigha qoyulghan.

Mezkur jem'iyet yaponiye parlaméntining öktichi we hakimiyet béshidiki partiyelerning parlamént ezaliridin teshkil tapqan idi. Yaponiye xitay bilen bolghan munasiwetlerde qattiq éhtiyatchan bolsimu, lékin yaponiye parlaméntida qurulghan bu jem'iyet, xitayning kishilik hoquq mesililiride, bolupmu Uyghurlar mesiliside yaponiye hökümitini téximu dadil bolushqa chaqirip kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.