Японийә парламенти бейҗиң қишлиқ олимпики һарписида уйғур кишилик һоқуқ қарар лайиһәсини авазға қойиду

Мухбиримиз әркин
2022-01-31
Share

Японийә парламенти 1-феврал йәни бейҗиң қишлиқ олимпикиниң ечилиш мурасимиға 3 күн қалған бир пәйттә, уйғурларниң кишилик һоқуқ вәзийитидин әндишә қиливатқанлиқиға аит бир қарар лайиһәсини авазға қойидикән. “блунберг хәвәрлири” агентлиқиниң 30-январ бәргән бу һәқтики хәвиридә, японийә парламентиниң бейҗиң қишлиқ олимпики һарписидики бу һәрикити хитайниң ғәзипини қозғайдиғанлиқи билдүрүлгән. Мәлум болушичә, бу қарар лайиһәси японийә парламентида һакимийәт бешидики партийә билән өктичи партийәләр арисида нәччә айдин бери қаттиқ муназирә қилинған.

“блумберг” ниң хәвиридә, бу қарар лайиһәсиниң қишлиқ олимпик һарписида вә японийә-хитай дипломатик мунасивитиниң 50 йиллиқида авазға қоюлуши нурғун японийә парламент әзалириниң бейҗиңниң кишилик һоқуқ дәпсәндичиликини җавабкарлиққа тартиш қарарини намаян қилидиғанлиқи тәкитләнгән. Бу тоғрисида японийә парламент әзаси, парламент кишилик һоқуқ гурупписиниң қош рәислириниң бири болған ясуе фунаяма өткән пәйшәнбә күни “блумберг” ниң зияритини қобул қилғанда японийә парламентиниң һәрикитини “тунҗи зор қәдәм” дәп көрсәткән.

У йәнә мундақ дегән: “әгәр пүтүн парламент кишилик һоқуқ вәзийити тоғрисида әндишә барлиқини қобул қилса, биз буниңға қарита немә иш қилишни көрүп чиқимиз”.

Японийә бурундин хитайниң кишилик һоқуқ мәсилилиригә ашкара позитсийә билдүрүшни халимисиму, бирақ у хитайниң 2020-йили хоңкоң демократийәсини бастурушидин позитсийәсини өзгәрткән. Баш министир фумио кишида өткән йили хитайни изчил тәнқидләп кәлгән сабиқ дөләт мудапиә министири накатанини өзиниң кишилик һоқуқ мәслиһәтчиси қилип бекиткән, шундақла өткән айда бейҗиң қишлиқ олимпикигә һөкүмәт әмәлдари әвәтмәйдиғанлиқини елан қилғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт