Yaponiye parlaménti béyjing qishliq olimpiki harpisida Uyghur kishilik hoquq qarar layihesini awazgha qoyidu

Muxbirimiz erkin
2022-01-31
Share

Yaponiye parlaménti 1-féwral yeni béyjing qishliq olimpikining échilish murasimigha 3 kün qalghan bir peytte, Uyghurlarning kishilik hoquq weziyitidin endishe qiliwatqanliqigha a'it bir qarar layihesini awazgha qoyidiken. “Blunbérg xewerliri” agéntliqining 30-yanwar bergen bu heqtiki xewiride, yaponiye parlaméntining béyjing qishliq olimpiki harpisidiki bu herikiti xitayning ghezipini qozghaydighanliqi bildürülgen. Melum bolushiche, bu qarar layihesi yaponiye parlaméntida hakimiyet béshidiki partiye bilen öktichi partiyeler arisida nechche aydin béri qattiq munazire qilin'ghan.

“Blumbérg” ning xewiride, bu qarar layihesining qishliq olimpik harpisida we yaponiye-xitay diplomatik munasiwitining 50 yilliqida awazgha qoyulushi nurghun yaponiye parlamént ezalirining béyjingning kishilik hoquq depsendichilikini jawabkarliqqa tartish qararini namayan qilidighanliqi tekitlen'gen. Bu toghrisida yaponiye parlamént ezasi, parlamént kishilik hoquq guruppisining qosh re'islirining biri bolghan yasu'é funayama ötken peyshenbe küni “Blumbérg” ning ziyaritini qobul qilghanda yaponiye parlaméntining herikitini “Tunji zor qedem” dep körsetken.

U yene mundaq dégen: “Eger pütün parlamént kishilik hoquq weziyiti toghrisida endishe barliqini qobul qilsa, biz buninggha qarita néme ish qilishni körüp chiqimiz”.

Yaponiye burundin xitayning kishilik hoquq mesililirige ashkara pozitsiye bildürüshni xalimisimu, biraq u xitayning 2020-yili xongkong démokratiyesini basturushidin pozitsiyesini özgertken. Bash ministir fumi'o kishida ötken yili xitayni izchil tenqidlep kelgen sabiq dölet mudapi'e ministiri nakatanini özining kishilik hoquq meslihetchisi qilip békitken, shundaqla ötken ayda béyjing qishliq olimpikige hökümet emeldari ewetmeydighanliqini élan qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet