Явропа иттипақи бейҗиң қишлиқ олимпикини байқут қилишта ‍ихтилапқа чүшүп қалған

Мухбиримиз әркин
2021.12.13
Share on WhatsApp
Share on WhatsApp

Явропа иттипақи 2022-йиллиқ бейҗиң қишлиқ олимпикини байқут қилишта ‍ихтилапқа чүшүп қалған. Ройтерс агентлиқиниң хәвәр қилишичә, явропа иттипақи дипломатлири әза дөләтләрниң қишлиқ олимпикни байқут қилишта техи ортақ пикир һасил қилмиғанлиқини ейтқан. Летва ташқи ишлар министири гебрелюс ләндисбургис 13-декабир фирансийә билән голландийә явропа иттипақиниң ортақ позитсийә тутуп, хитай кишилик һоқуқ дәпсәндичиликигә инкас қайтурушни тәләп қилған әһвалда, ‍өзиниң бейҗиң қишлиқ олимпикигә бармайдиғанлиқини билдүргән.

Люксемберг ташқи ишлар министири жан ‍асселборн иттипақниң “бүгүн яки бу һәптә ичидә бир һәл қилиш чариси тепиши натайинлиқи” ни ейтқан. Бирақ ройтерсниң билдүрүшичә, явропа иттипақи рәһбәрлири бу мәсилини пәйшәнбә күни музакирә қилишни күнтәртипкә киргүзгән болуп, фирансийә билән германийә явропа ититпақиниң ортақ позитсийә тутушини қоллиған. Фирансийә ташқи ишлар министири ле дериян ‍өткән һәптә фирансийәниң иттипақтики башқа дөләтләр билән ортақ позитсийәдә туруши керәкликини тәкитлигән. Униң пикири германийә ташқи ишлар министири анналена барбокниң қоллишиға еришкән.

‍Охшаш бир вақитта фирансийә президенти макрон, фирансийәниң қисмән байқутқа қизиқмайдиғанлиқини ипадиләп, “ениқини ейтқанда, яки сиз толуқ байқут қилип тәнһәрикәтчиләрниму әвәтмәйсиз вә яки пайдилиқ һәрикәтләр арқилиқ һазирқи һаләтни өзгәртишкә тиришчанлиқ көрситисиз” дегән.

Ройтерсниң билдүрүшичә, дипломатлар иттипақтики хитайниң йеқин дости болған венгирийәниң дипломатик байқутни қоллимаслиқи мумкинлики, қалған 26 дөләтниң ортақ пикир һасил қилиши мумкинликини ейтқан. Бирақ ғәрбниң асиядики муһим иттипақдиши болған японийә билән җәнубий корейә қишлиқ олимпикни байқут қилмайдиғанлиқини билдүргән. Мәлум болушичә, японийә униңға пәқәт министир дәриҗилик әмәлдар әвәтмәйдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт