Явропа базири мәҗбурий әмгәк мәһсулатлирини төкмә қилип сатидиған базарға айлинип қалған

Вашингтондин мухбиримиз җәвлан тәйярлиди
2024.04.03

Коммунизм қурбанлири хатирә фондиниң алий тәтқиқатчиси адриян зенз 2-апрел күни X да учур йоллап: “явропа иттипақи шинҗаңдики мәҗбурий әмгәк әң еғир җайдин келидиған малларни төкмә қилип сатидиған әхләтханиға айлинип қалмақта. Бу пәқәт 1- вә 2-айлардики санлиқ мәлуматлар (йиллиқ рәқәмдин ешип кәткән) болуп, мал сетишта 200 пирсәнтлик ешиш болуватқанлиқидин бешарәт бәрмәктә” дегән.

Адриян зензниң бу сөзи хитайниң явропа базириға експорт қиливатқан мәҗбурий әмгәк маллириниң експорт миқдариниң давамлиқ ешип беришиға болған әндишини әкс әттүрмәктә.

Бу йил 5-март күни, явропа иттипақи кеңиши билән явропа парламенти мәҗбурий әмгәк мәһсулатлириниң явропа базириға киришини чәкләйдиған йеңи қанун-чариләр тоғрисида вақитлиқ келишим һасил қилғаниди. Тәтқиқатчи адриян зенз бу һәқтә радийомизниң зияритини қобул қилғанда, “бу қанунниң уйғур мәҗбурий әмгикини чәкләштики әмәлий күчи гуманлиқ. Қанундики маддиларға асасән, явропа иттипақи мәлум бир мәһсулатта уйғур мәҗбурий әмгикиниң бар-йоқлуқини тәкшүрүп ениқлиши керәк. Бу мумкин болмайдиған иш, шуңа бу қанунниң қанчилик күчкә игә болидиғанлиқи һазирчә ениқ әмәс” дегәниди.

 “җәнубий хитай әтигәнлик почтиси” гезитиниң 21-март бәргән хәвиридә, явропа иттипақидики 27 дөләтниң бу йил 1- вә 2-айларда уйғур дияридин импорт қилған таварларниң өткән йилиниң охшаш мәзгилидикидин 200 пирсәнттин көп ашқанлиқи хәвәр қилинғаниди. Тәтқиқатчи адриян зенз X дә елан қилған учурида мәзкур хәвәрни мәнбә сүпитидә көрсәткән болуп, явропа иттипақиниң бир яқтин мәҗбурий әмгәкни чәкләйдиған  вақитлиқ келишим түзүп, бир яқтин хитайдин мәҗбурий әмгәк мәһсулатлирини көпләп импорт қиливатқанлиқини әскәрткән. У радийомизға қилған сөзидиму явропа иттипақидики дөләтләрниң өз иқтисадидин көпрәк әнсирәйдиғанлиқи вә мәҗбурий әмгәк мәсилисини йетәрлик чүшәнмәйдиғанлиқини билдүргәниди.

  “җәнубий хитай әтигәнлик почтиси” гезити бәргән хәвиридә ейтилишичә, явропа иттипақиға әза дөләтләр ичидә хитайдин келидиған мәҗбурий әмгәк мәһсулатлирини әң көп импорт қилидиған дөләт полша, белгийә, голландийә қатарлиқ дөләтләр болуп, улар хитайдин киргүзидиған маллар асасән литий батарейәси, пәмидур қиями вә пахта тоқумичилиқ мәһсулатлири икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.