Yawropa baziri mejburiy emgek mehsulatlirini tökme qilip satidighan bazargha aylinip qalghan

Washin'gtondin muxbirimiz jewlan teyyarlidi
2024.04.03

Kommunizm qurbanliri xatire fondining aliy tetqiqatchisi adriyan zénz 2-aprél küni X da uchur yollap: “Yawropa ittipaqi shinjangdiki mejburiy emgek eng éghir jaydin kélidighan mallarni tökme qilip satidighan exletxanigha aylinip qalmaqta. Bu peqet 1- we 2-aylardiki sanliq melumatlar (yilliq reqemdin éship ketken) bolup, mal sétishta 200 pirsentlik éshish boluwatqanliqidin bésharet bermekte” dégen.

Adriyan zénzning bu sözi xitayning yawropa bazirigha éksport qiliwatqan mejburiy emgek mallirining éksport miqdarining dawamliq éship bérishigha bolghan endishini eks ettürmekte.

Bu yil 5-mart küni, yawropa ittipaqi kéngishi bilen yawropa parlaménti mejburiy emgek mehsulatlirining yawropa bazirigha kirishini chekleydighan yéngi qanun-chariler toghrisida waqitliq kélishim hasil qilghanidi. Tetqiqatchi adriyan zénz bu heqte radiyomizning ziyaritini qobul qilghanda, “Bu qanunning Uyghur mejburiy emgikini chekleshtiki emeliy küchi gumanliq. Qanundiki maddilargha asasen, yawropa ittipaqi melum bir mehsulatta Uyghur mejburiy emgikining bar-yoqluqini tekshürüp éniqlishi kérek. Bu mumkin bolmaydighan ish, shunga bu qanunning qanchilik küchke ige bolidighanliqi hazirche éniq emes” dégenidi.

 “Jenubiy xitay etigenlik pochtisi” gézitining 21-mart bergen xewiride, yawropa ittipaqidiki 27 döletning bu yil 1- we 2-aylarda Uyghur diyaridin import qilghan tawarlarning ötken yilining oxshash mezgilidikidin 200 pirsenttin köp ashqanliqi xewer qilin'ghanidi. Tetqiqatchi adriyan zénz X de élan qilghan uchurida mezkur xewerni menbe süpitide körsetken bolup, yawropa ittipaqining bir yaqtin mejburiy emgekni chekleydighan  waqitliq kélishim tüzüp, bir yaqtin xitaydin mejburiy emgek mehsulatlirini köplep import qiliwatqanliqini eskertken. U radiyomizgha qilghan sözidimu yawropa ittipaqidiki döletlerning öz iqtisadidin köprek ensireydighanliqi we mejburiy emgek mesilisini yéterlik chüshenmeydighanliqini bildürgenidi.

  “Jenubiy xitay etigenlik pochtisi” géziti bergen xewiride éytilishiche, yawropa ittipaqigha eza döletler ichide xitaydin kélidighan mejburiy emgek mehsulatlirini eng köp import qilidighan dölet polsha, bélgiye, gollandiye qatarliq döletler bolup, ular xitaydin kirgüzidighan mallar asasen litiy bataréyesi, pemidur qiyami we paxta toqumichiliq mehsulatliri iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.