Явропа иттипақиниң русийә вә хитай мәсилисидә қаттиқ қол йол тутидиғанлиқи илгири сүрүлди

Мухбиримиз әркин
2021-02-23
Share

Явропа иттипақиниң русийә вә хитай мәсилисидә американиң қаттиқ қол йолға қарап меңиватқанлиқи илгири сүрүлди. "вал стерет журнили" гезитиниң хәвәр қилишичә, явропа иттипақи русийәниң өктичиләр рәһбири аликсей навалнини қамаққа елишиға қарши русийә әмәлдарлирини җазалашни, шуниңдәк хитайниң хоңкоңдики бастурушиға қарши қандақ тәдбир елишни муназирә қилишни пиланлап, өзлириниң русийә вә хитай мәсилисидә америкадәк қаттиқ қол йолға маңидиғанлиқиниң сигналини бәргән.

Америка ташқи ишлар министири антони блинкен 22-феврал явропа иттипақидики 27 дөләтниң ташқи ишлар министирлири билән торда сөһбәт өткүзгән. Йиғинда блинкен америка билән явропа иттипақиниң зич һәмкарлишип, көп қутуплуқ, демократийә, кишилик һоқуқ дуч кәлгән йәршари характерлик хирисқа тақабил турушниң муһимлиқини тәкитлигән. Йиғинда тәрәпләр корона вируси, иран, хитай, йәршари һава килиматини өз ичигә алған йәршари характерлик мәсилиләрни музакирә қилғаниди.

"вал стерет журнили" ниң хәвиридә баян қилинишичә, явропа иттипақи әмәлдарлири өзлириниң ташқи сиясәттики мустәқиллиқини тәкитлисиму, бирақ президент байден вәзипигә олтурғандин буян өзлириниң һалқилиқ мәсилиләрдә америка билән бир мәйданда икәнликини ипадилимәктикән. Хәвәрдә, явропа иттипақиниң хоңкоң тоғрисидики бир мәхпий һөҗҗити тилға елинип, униңда хитайға бесим қилиш үчүн америка вә башқа иттипақдаш дөләтләр билән техиму яхши һәмкарлишиш тәләп қилинғанлиқи тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт