Явропа иттипақи: «шинҗаңни зиярәт қилиш үчүн еһтият билән тәйярлиқ қилишимизға тоғра келиду»

Мухбиримиз әркин
2019-03-25
Елхәт
Пикир
Share
Принт

Явропа иттипақи, бейҗиңда турушлуқ дипломатлириниң тәклипкә бинаән уйғур аптоном районида елип баридиған зияритиниң бу һәптә әмәлгә ашмайдиғанлиқини билдүргән.

Ройтерс агентлиқиниң хәвәр қилишичә, явропа иттипақиниң бейҗиңда турушлуқ вәкилиниң баянатчиси дүшәнбә күни бу зиярәткә «еһтият билән тәйярлиқ қилишқа тоғра келидиғанлиқи» ни илгири сүргән.

Хитай һөкүмити өткән һәптә, йәни 21‏-март күни явропа иттипақиға әза дөләтләрниң бейҗиңда турушлуқ дипломатлирини 27‏-марттин 29‏-мартқичә уйғур районида зиярәттә болушқа тәклип қилғанлиқини елан қилған. Бу зиярәт, хитай рәиси ши җинпиң явропада зиярәттә болуватқан бир мәзгилгә орунлаштурулған.

Мәлум болушичә, нөвәттә франсийәдә зиярәттә болуватқан ши җинпиң зияритиниң ахирқи күни, йәни 26‏-март күни явропа иттипақиниң рәһбәрлири билән учришидикән. Буниң алдида кишилик һоқуқ көзитиш тәшкилати баянат елан қилип, фирансийә президенти макронниң уйғур мәсилисини оттуриға қоюшини, лагерларни тақап, тутқунларни қоюп беришни оттуриға қоюшини тәләп қилған иди.

Ройтерс агентлиқиниң хәвәр қилишичә, явропа иттипақиниң бейҗиңда турушлуқ вәкилиниң баянатчиси дүшәнбә күни хитайниң зиярәт тәклипи һәққидә тохтилип, «явропа иттипақи вә явропа иттипақиға әза дөләтләр принсип җәһәттә зиярәт тәклипини қарши елиш билән биллә бу хил зиярәтниң һәқиқий йосунда елип берилиши үчүн еһтият билән тәйярлиқ қилишқа тоғра келиду» дегән.

У йәнә; «бу һәқтики музакиримиз давам қилмақта, шуниң үчүн зиярәт пиланимиз бу һәптә ишқа ашмайду. явропа иттипақи, бизниң күткән тәләплиримиз һесабқа елинған кәлгүси зиярәткә давамлиқ очуқ муамилә тутиду» дегән. Лекин у қандақ тәләпләрниң һесабқа елиниши керәкликини чүшәндүрмигән.

Өткән йили 15 ғәрб дөлитиниң бейҗиңда турушлуқ дипломатлири уйғур аптоном районлуқ партком секретари чен чүәнго билән көрүшүп, униң билән уйғурларниң кишилик һоқуқ вәзийитини сөзлишишни тәләп қилған. Лекин хитай һөкүмити буниңға һазирға қәдәр иҗабий җаваб бәрмигән иди.

Ройтерсниң хәвәр қилишичә, явропа иттипақи зиярәтниң бу һәптә әмәлгә ашмайдиғанлиқини елан қилиштин сәл аввал американиң бир әмәлдари, хитай һөкүмитиниң районға «ясалма» зиярәтләрни тәшкилләп, кишиләрни қаймуқтуруватқанлиқини илгири сүргән.

Пикирләр (0)
Share
Толуқ бәт