Yawropa ittipaqi: "Shinjangni ziyaret qilish üchün éhtiyat bilen teyyarliq qilishimizgha toghra kélidu"

Muxbirimiz erkin
2019-03-25
Élxet
Pikir
Share
Print

Yawropa ittipaqi, béyjingda turushluq diplomatlirining teklipke bina'en Uyghur aptonom rayonida élip baridighan ziyaritining bu hepte emelge ashmaydighanliqini bildürgen.

Roytérs agéntliqining xewer qilishiche, yawropa ittipaqining béyjingda turushluq wekilining bayanatchisi düshenbe küni bu ziyaretke "Éhtiyat bilen teyyarliq qilishqa toghra kélidighanliqi" ni ilgiri sürgen.

Xitay hökümiti ötken hepte, yeni 21‏-mart küni yawropa ittipaqigha eza döletlerning béyjingda turushluq diplomatlirini 27‏-marttin 29‏-martqiche Uyghur rayonida ziyarette bolushqa teklip qilghanliqini élan qilghan. Bu ziyaret, xitay re'isi shi jinping yawropada ziyarette boluwatqan bir mezgilge orunlashturulghan.

Melum bolushiche, nöwette fransiyede ziyarette boluwatqan shi jinping ziyaritining axirqi küni, yeni 26‏-mart küni yawropa ittipaqining rehberliri bilen uchrishidiken. Buning aldida kishilik hoquq közitish teshkilati bayanat élan qilip, firansiye prézidénti makronning Uyghur mesilisini otturigha qoyushini, lagérlarni taqap, tutqunlarni qoyup bérishni otturigha qoyushini telep qilghan idi.

Roytérs agéntliqining xewer qilishiche, yawropa ittipaqining béyjingda turushluq wekilining bayanatchisi düshenbe küni xitayning ziyaret teklipi heqqide toxtilip, "Yawropa ittipaqi we yawropa ittipaqigha eza döletler prinsip jehette ziyaret teklipini qarshi élish bilen bille bu xil ziyaretning heqiqiy yosunda élip bérilishi üchün éhtiyat bilen teyyarliq qilishqa toghra kélidu" dégen.

U yene؛ "Bu heqtiki muzakirimiz dawam qilmaqta, shuning üchün ziyaret pilanimiz bu hepte ishqa ashmaydu. Yawropa ittipaqi, bizning kütken teleplirimiz hésabqa élin'ghan kelgüsi ziyaretke dawamliq ochuq mu'amile tutidu" dégen. Lékin u qandaq teleplerning hésabqa élinishi kéreklikini chüshendürmigen.

Ötken yili 15 gherb dölitining béyjingda turushluq diplomatliri Uyghur aptonom rayonluq partkom sékrétari chén chüen'go bilen körüshüp, uning bilen Uyghurlarning kishilik hoquq weziyitini sözlishishni telep qilghan. Lékin xitay hökümiti buninggha hazirgha qeder ijabiy jawab bermigen idi.

Roytérsning xewer qilishiche, yawropa ittipaqi ziyaretning bu hepte emelge ashmaydighanliqini élan qilishtin sel awwal amérikaning bir emeldari, xitay hökümitining rayon'gha "Yasalma" ziyaretlerni teshkillep, kishilerni qaymuqturuwatqanliqini ilgiri sürgen.

Toluq bet