Явропа иттипақи иқтисад вә иҗтимаий комитети рәиси һенри малосси уйғур кимликиниң тәһдиткә учраватқанлиқини билдүрди

Мухбиримиз ирадә
2019-05-28
Share

Явропа иттипақиниң иқтисад вә иҗтимаий комитети рәиси һенри малосси мәхсус уйғурлар һәққидә мақалә елан қилип, уйғурларниң миллий кимликиниң тәһдиткә учраватқанлиқини билдүрди.

У "явропа хәвәрлири" торида елан қилған мақалисигә "хитайдики уйғурлар йәниму еғир кәмситишкә дуч кәлмәктә" дәп мавзу қойған. Һенрий малосси әпәнди мақалисидә хитай һөкүмитиниң уйғур елидә хитайлаштуруш сияситини йүргүзүп кәлгәнликини, ‏2014‏-йили чәрчән наһийәлик парткомниң мәхсус уйғур-хитай тойлишишини илгири сүрүш үчүн той қилған аилиләрни 10 миң сом билән мукапатлаш сиясити чиқиришиниң буниң бир мисали икәнликини баян қилған.

Униң баян қилишичә, хитай һөкүмитиниң бу пилани, маддий мукапат билән тәқдирлинидиған болушиға қаримай, районда асасән мәғлуп болған. Нәтиҗидә хитай һөкүмити райондики хитай болмиған милләтләрниң мәдәнийитини йоқ қилиш үчүн йеңичә истратегийәләрни синашни башлиған.

Һенрий малосси әпәндиниң қаришичә, бу тактикиларниң бири дәл һазир йолға қоюлуватқан вә аз дегәндә бир милйон уйғур қатарлиқ йәрлик милләтләр қамалған қайта-тәрбийә лагерлири болса, униң йәнә бири, алий мәктәпкә өтүш имтиһанида "милләтләр ара тойлишиш" тин болған балиларға алий мәктәп имтиһанида 20 номур қошуп бериш сиясити икән.

Уйғур райони даирилири бу айниң бешида әслидики хитай тилида имтиһан бәргән уйғурларға 50 номур қошуп бериш сияситини бикар қилип, униң орниға ата-анисидин бири хитай болған, йәни бир уйғур, бир хитайға охшаш "милләтләр-ара тойлишиш" тин болған балиларға 20 номур қетип беридиғанлиқини җакарлиған иди.

Һенри малосси әпәнди мақалисидә, юқиридики бу қарар билән ата-ана һәр иккилиси уйғур болған балиларниң өрләп оқуш пурситиниң тәбиий һалда чәклинидиғанлиқини вә буниң интайин еғир бир етник кәмситиш һесаблинидиғанлиқини баян қилған.

У хитай һөкүмитиниң уйғурларниң мәдәнийәт вә кимлик асасини йоқ қилиш һәрикитини қаттиқ күчәйтиватқанлиқини әскәрткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт