Yawropa ittipaqi iqtisad we ijtima'iy komitéti re'isi hénri malossi Uyghur kimlikining tehditke uchrawatqanliqini bildürdi

Muxbirimiz irade
2019-05-28
Share

Yawropa ittipaqining iqtisad we ijtima'iy komitéti re'isi hénri malossi mexsus Uyghurlar heqqide maqale élan qilip, Uyghurlarning milliy kimlikining tehditke uchrawatqanliqini bildürdi.

U "Yawropa xewerliri" torida élan qilghan maqalisige "Xitaydiki Uyghurlar yenimu éghir kemsitishke duch kelmekte" dep mawzu qoyghan. Hénriy malossi ependi maqaliside xitay hökümitining Uyghur élide xitaylashturush siyasitini yürgüzüp kelgenlikini, ‏2014‏-yili cherchen nahiyelik partkomning mexsus Uyghur-xitay toylishishini ilgiri sürüsh üchün toy qilghan a'ililerni 10 ming som bilen mukapatlash siyasiti chiqirishining buning bir misali ikenlikini bayan qilghan.

Uning bayan qilishiche, xitay hökümitining bu pilani, maddiy mukapat bilen teqdirlinidighan bolushigha qarimay, rayonda asasen meghlup bolghan. Netijide xitay hökümiti rayondiki xitay bolmighan milletlerning medeniyitini yoq qilish üchün yéngiche istratégiyelerni sinashni bashlighan.

Hénriy malossi ependining qarishiche, bu taktikilarning biri del hazir yolgha qoyuluwatqan we az dégende bir milyon Uyghur qatarliq yerlik milletler qamalghan qayta-terbiye lagérliri bolsa, uning yene biri, aliy mektepke ötüsh imtihanida "Milletler ara toylishish" tin bolghan balilargha aliy mektep imtihanida 20 nomur qoshup bérish siyasiti iken.

Uyghur rayoni da'iriliri bu ayning béshida eslidiki xitay tilida imtihan bergen Uyghurlargha 50 nomur qoshup bérish siyasitini bikar qilip, uning ornigha ata-anisidin biri xitay bolghan, yeni bir Uyghur, bir xitaygha oxshash "Milletler-ara toylishish" tin bolghan balilargha 20 nomur qétip béridighanliqini jakarlighan idi.

Hénri malossi ependi maqaliside, yuqiridiki bu qarar bilen ata-ana her ikkilisi Uyghur bolghan balilarning örlep oqush pursitining tebi'iy halda cheklinidighanliqini we buning intayin éghir bir étnik kemsitish hésablinidighanliqini bayan qilghan.

U xitay hökümitining Uyghurlarning medeniyet we kimlik asasini yoq qilish herikitini qattiq kücheytiwatqanliqini eskertken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet