Явропа иттипақи парламенти уйғур дияридики зулумларни “қирғинчилиқ” дәп қарар елишқа чақирилди

Мухбиримиз әзиз
2022.06.07
Share on WhatsApp
Share on WhatsApp

Явропа иттипақидики зор тәсиргә игә бир қисим шәхсләр явропа иттипақи парламентиға чақириқ қилип, уйғур дияридики зулум вә бастурушларни “қирғинчилиқ” дәп рәсмий қарар елишни тәләп қилған.

“җәнубий хитай сәһәр почтиси” гезитиниң 7-июндики обзор мақалисидә көрситилишичә, явропа иттипақидики төт чоң партийә мәзкур чақириқни һимайә қилидиғанлиқини билдүргән болуп, буларниң һәммиси мушу һәптә явропа парламентида чақирилидиған бу һәқтики муназиригә қатнишидикән. Шу сәвәбтин бу қетимқи муназирә йиғинида қирғинчилиқ һәққидә қарар елишниң еһтималлиқи чоң, дәп қариливатқан болуп, бу явропа иттипақи үчүн бир чоң илгириләш һесаблинидикән. Чүнки улар уйғур дияридики сиясий бастурушлар вә зулумлар һәққидә көплигән қарарларни алған болсиму, әмма “қирғинчилиқ” дегән сөзни ишләтмигәникән.

Обзорда ейтилишичә, явропа иттипақиниң рәһбәрлик қатлимидики урсула лейен (Ursula von der Leyen) вә германийәниң сабиқ рәһбири анҗела мәркел (Angela Merkel) изчил хитай билән болған һәмкарлиқни муһим орунға қоюп кәлгәнлики үчүн, явропа иттипақиниң уйғур дияридики қирғинчилиқ қилмиши һәққидә қарар елиши әмәлгә ашмай кәлгәникән. Германийәниң йеңи рәһбири олаф шулиз (Olaf Scholz) болса хитай билән болған алақини тохтитиш һәққидики пикри билән даң чиқарған шәхс икән. Йәнә келип уйғур дияридики лагерлар вә тутқунға мунасивәтлик һөҗҗәтләрниң йеқиндин буян көпләп ашкара болушиму буниңға түрткә болған бир муһим сәвәб икән. явропа парламентиниң әзалиридин дәйвид лега (David Lega) бу һәқтә өзиниң тиветтер бетидә учур йоллап “биз шинҗаңдики уйғур қирғинчилиқини етирап қилиш һәққидә парламентқа бесим қиливатимиз. ‛шинҗаң сақчи һөҗҗәтлири‚ бу реаллиқни йәнә бир қетим тәстиқлиди. Мән буни әтики қарар елиш йиғинида зор күч билән тәкитләймән” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт