Yawropa ittipaqi parlaménti Uyghur diyaridiki zulumlarni “Qirghinchiliq” dep qarar élishqa chaqirildi

Muxbirimiz eziz
2022.06.07
Share on WhatsApp
Share on WhatsApp

Yawropa ittipaqidiki zor tesirge ige bir qisim shexsler yawropa ittipaqi parlaméntigha chaqiriq qilip, Uyghur diyaridiki zulum we basturushlarni “Qirghinchiliq” dep resmiy qarar élishni telep qilghan.

“Jenubiy xitay seher pochtisi” gézitining 7-iyundiki obzor maqaliside körsitilishiche, yawropa ittipaqidiki töt chong partiye mezkur chaqiriqni himaye qilidighanliqini bildürgen bolup, bularning hemmisi mushu hepte yawropa parlaméntida chaqirilidighan bu heqtiki munazirige qatnishidiken. Shu sewebtin bu qétimqi munazire yighinida qirghinchiliq heqqide qarar élishning éhtimalliqi chong, dep qariliwatqan bolup, bu yawropa ittipaqi üchün bir chong ilgirilesh hésablinidiken. Chünki ular Uyghur diyaridiki siyasiy basturushlar we zulumlar heqqide köpligen qararlarni alghan bolsimu, emma “Qirghinchiliq” dégen sözni ishletmigeniken.

Obzorda éytilishiche, yawropa ittipaqining rehberlik qatlimidiki ursula léyén (Ursula von der Leyen) we gérmaniyening sabiq rehbiri anjéla merkél (Angela Merkel) izchil xitay bilen bolghan hemkarliqni muhim orun'gha qoyup kelgenliki üchün, yawropa ittipaqining Uyghur diyaridiki qirghinchiliq qilmishi heqqide qarar élishi emelge ashmay kelgeniken. Gérmaniyening yéngi rehbiri olaf shuliz (Olaf Scholz) bolsa xitay bilen bolghan alaqini toxtitish heqqidiki pikri bilen dang chiqarghan shexs iken. Yene kélip Uyghur diyaridiki lagérlar we tutqun'gha munasiwetlik höjjetlerning yéqindin buyan köplep ashkara bolushimu buninggha türtke bolghan bir muhim seweb iken. Yawropa parlaméntining ezaliridin deywid léga (David Lega) bu heqte özining tiwéttér bétide uchur yollap “Biz shinjangdiki Uyghur qirghinchiliqini étirap qilish heqqide parlaméntqa bésim qiliwatimiz. ‛shinjang saqchi höjjetliri‚ bu ré'alliqni yene bir qétim testiqlidi. Men buni etiki qarar élish yighinida zor küch bilen tekitleymen” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet