Явропа иттипақи хитайни уйғур районида хәлқаралиқ мустәқил тәкшүрүш елип беришқа йол қоюшқа чақирди

Мухбиримиз әркин
2019-09-20
Елхәт
Пикир
Share
Принт

Явропа иттипақиниң вәкили б д т кишилик һоқуқ кеңишиниң җәнвәдә өткүзүлүватқан 42 ‏-нөвәтлик йиғинида сөз қилип, уйғур райониниң вәзийитидин қаттиқ әндишә қиливатқанлиқи, хитайниң мәзкур районда мустәқил хәлқара тәкшүрүш елип берилишиға йол қоюшини тәләп қилған.

Финландийәниң кишилик һоқуқ кеңишидә турушлуқ вәкили сари лихтеранта 17‏-сентәбир явропа иттипақи вә униңға намзат шималий македонийә, монтенегро, албанийә қатарлиқ дөләтләргә вакалитән қилған сөзидә «явропа иттипақи шинҗаңдики сиясий қайта-тәрбийәләш лагерлиридин, кәң көләмлик тәқибләштин, уйғур вә башқа мусулман аз санлиқ милләтләргә қарита елип берилған диний етиқадни чәкләш һәрикәтлиридин әндишә қилмақта. Биз хитайни б д т кишилик һоқуқ алий комиссарини өз ичигә алған мустәқил тәкшүргүчиләрниң районда һәқиқий рәвиштә тәкшүрүш елип беришиға йол қоюшқа чақиримиз» дегән. 

У йәнә явропа иттипақиниң хитайни қанун билән башқурушқа, адил сотлашқа капаләтлик қилишқа, кишилик һоқуқ қоғдиғучилири вә уларниң аилә тавабиатлириниң халиғанчә тутқун қилиниш, хорлиниш вә тән җазасиға учраш делолирини әтраплиқ тәкшүрүшкә чақиридиғанлиқини билдүрүп, ташполат тейип, илһам тохти, гав җишең, хуа хи, таши ваңчуқ қатарлиқ кишиләрни өз ичигә алған адвокат вә кишилик һоқуқни қоғдиғучиларниң тутқун қилиниши һәм сотлинишидин қаттиқ әндишә қиливатқанлиқи, явропа иттипақиниң уларни дәрһал қоюп беришқа чақиридиғанлиқини тәкитлигән.

Сари лехтирантаниң қәйт қилишичә, «явропа иттипақи хитайни дөләт ичи вә хәлқарада үстигә алған мәҗбурийитини ада қилип, кишилик һоқуққа һөрмәт қилишқа, болупму шинҗаң вә тибәттики аз санлиқ милләт кишилириниң һәқ-һоқуқлириға һөрмәт қилишқа чақиридикән.» 

Бу явропа иттипақиниң шинҗаң университетиниң сабиқ мудири, доктор ташполат тейипниң мәсилисини тунҗи қетим б д т да оттуриға қоюшидур. Йеқинда хәлқара кәчүрүм тәшкилати җиддий баянат елан қилип, доктор ташполат тейипниң наһәқ өлүм җазасиниң сентәбир ейи ичидә иҗра қилиниши мумкинлики, буни дәрһал тохтитивелишқа чақирған иди.

Пикирләр (0)
Share
Толуқ бәт