Yawropa ittipaqi xitayni Uyghur rayonida xelq'araliq musteqil tekshürüsh élip bérishqa yol qoyushqa chaqirdi

Muxbirimiz erkin
2019-09-20
Élxet
Pikir
Share
Print

Yawropa ittipaqining wekili b d t kishilik hoquq kéngishining jenwede ötküzülüwatqan 42 ‏-nöwetlik yighinida söz qilip, Uyghur rayonining weziyitidin qattiq endishe qiliwatqanliqi, xitayning mezkur rayonda musteqil xelq'ara tekshürüsh élip bérilishigha yol qoyushini telep qilghan.

Finlandiyening kishilik hoquq kéngishide turushluq wekili sari lixtéranta 17‏-séntebir yawropa ittipaqi we uninggha namzat shimaliy makédoniye, monténégro, albaniye qatarliq döletlerge wakaliten qilghan sözide "Yawropa ittipaqi shinjangdiki siyasiy qayta-terbiyelesh lagérliridin, keng kölemlik teqibleshtin, Uyghur we bashqa musulman az sanliq milletlerge qarita élip bérilghan diniy étiqadni cheklesh heriketliridin endishe qilmaqta. Biz xitayni b d t kishilik hoquq aliy komissarini öz ichige alghan musteqil tekshürgüchilerning rayonda heqiqiy rewishte tekshürüsh élip bérishigha yol qoyushqa chaqirimiz" dégen. 

U yene yawropa ittipaqining xitayni qanun bilen bashqurushqa, adil sotlashqa kapaletlik qilishqa, kishilik hoquq qoghdighuchiliri we ularning a'ile tawabi'atlirining xalighanche tutqun qilinish, xorlinish we ten jazasigha uchrash délolirini etrapliq tekshürüshke chaqiridighanliqini bildürüp, tashpolat téyip, ilham toxti, gaw jishéng, xu'a xi, tashi wangchuq qatarliq kishilerni öz ichige alghan adwokat we kishilik hoquqni qoghdighuchilarning tutqun qilinishi hem sotlinishidin qattiq endishe qiliwatqanliqi, yawropa ittipaqining ularni derhal qoyup bérishqa chaqiridighanliqini tekitligen.

Sari léxtirantaning qeyt qilishiche, "Yawropa ittipaqi xitayni dölet ichi we xelq'arada üstige alghan mejburiyitini ada qilip, kishilik hoquqqa hörmet qilishqa, bolupmu shinjang we tibettiki az sanliq millet kishilirining heq-hoquqlirigha hörmet qilishqa chaqiridiken." 

Bu yawropa ittipaqining shinjang uniwérsitétining sabiq mudiri, doktor tashpolat téyipning mesilisini tunji qétim b d t da otturigha qoyushidur. Yéqinda xelq'ara kechürüm teshkilati jiddiy bayanat élan qilip, doktor tashpolat téyipning naheq ölüm jazasining séntebir éyi ichide ijra qilinishi mumkinliki, buni derhal toxtitiwélishqa chaqirghan idi.

Toluq bet