Yawropa ittipaqi “Magnitiskiy qanuni” maqullap, kishilik hoquq depsendichilirini jawabkarliqqa tartidighanliqini élan qildi
2019.12.10
Yawropa ittipaqi 9-dékabir özining “Magnitiskiy qanuni” ni maqullap, dunyadiki her qaysi jayliridiki kishilik hoquq depsendichilirini jawabkarliqqa tartidighanliqini élan qilghan.
Yawropa ittipaqining “Dunya kishilik hoquq küni” harpisida, shundaqla xelq'arada xitayning Uyghur rayonidiki éghir kishilik hoquq depsendichilikini jawabkarliqqa tartish dolquni kötürülgen mezgilde “Magnitiskiy qanuni” maqullaydighanliqini élan qilishi alahide diqqet qozghidi. Yawropa ittipaqining tashqi ishlar bixeterlik aliy komissari joséf borélning bildürüshiche, yawropa ittipaqi tashqi ishlar ministirlirining 9-dékabir küni biryussélda ötküzülgen yighini birdek magnitiskiy qanuni chiqirip, kishilik hoquq depsendichilirini jawabkarliqqa tartishni qarar qilghan.
Joséf borél muxbirlargha bergen bayanatida, “Biz qanun chiqirip, kishilik hoquqni depsende qilish qilmishlirigha qarshi yer shari xaraktérlik jazalash tedbiri yürgüzüshni qarar qilduq. Yawropa ittipaqining qanuni amérikining magnitiskiy qanuni bilen oxshash bolidu” dégen. Amérika awam palatasining 3-dékabir küni maqullan'ghan “Uyghur kishilik hoquq qanun layihesi” de tramp hökümitining “Magnitiskiy kishilik hoquq qanuni” ni ishqa sélip, chén chüen'go bashchiliqidiki Uyghur rayonida kishilik hoquqni depsende qiliwatqan xitay emeldarlirini jawabkarliqqa tartish telep qilin'ghan idi. Joséf bayanatida yene, “Bu qanun yawropa ittipaqining yer shari kishilik hoquq mesililiridiki yétekchilik ornini namayan qilidighan estayidil bir qedemdur” dégen.
Yawropa ittipaqining mezkur qarari Uyghur kishilik hoquq teshkilatliri xelq'ara jem'iyetni Uyghur krizisigha arilishishqa chaqiriwatqan mezgilde chiqirildi. Amérikidiki Uyghur kishilik hoquq qurulushi teshkilati 9-dékabir küni bayanat élan qilip, “Eger uniwérsal kishilik hoquq xitabnamisining bir ehmiyiti bolsa, b d t sherqiy türkistandiki kishilik hoquq krizisigha qarita derhal heriket qollinishi kérek” dégen.