Kishilik hoquq teshkilatliri yawropa ittipaqi rehberlirini yarwropa-xitay bashliqlar söhbitide kishilik hoquqni muzakire qilishqa chaqirdi

Muxbirimiz erkin
2022.03.18
Share on WhatsApp
Share on WhatsApp

Dunya Uyghur qurultiyi, kishilik hoquqni közitish teshkilati, xelq'ara kishilik hoquq fédératsiyesi qatarliq 10 dek teshkilat yawropa ittipaqi rehberlirige xet yézip, xitay bilen bolghan kishilik hoquq di'alogini toxtitishni, 1-‍aprél küni ötküzülidighan xitay-yawropa ittipaqi bashliqlar yighinida xitaydiki kishilik hoquq depsendichilikini muzakire qilishni telep qilghan.

Yawropa komissiyesi prézidénti ‍ursula fon dér léyén, yawropa kéngishining prézidénti charlis mékil, tashqiy ishlar aliy komissari joséf borélgha yézilghan xette, yawropa ittipaqining xitaydiki kishilik hoquq krizisige qarita bir qatar tedbirlerni qollan'ghan bolsimu, biraq uning tedbirliri “Bu kirizisning éghirliqigha nisbeten mas kelmigenliki” ni bildürgen.

Xette, yéqinqi weqeler xitay hökümitining 2019-yildiki bashliqlar yighinining axirida bayan qilin'ghan atalmish “Xelq'ara qanun'gha hörmet qilish, b d t ning yadrosi we xelq'ara munasiwetni bashqurush qa'idisi qollanmisi bolghan b d t ni yadro qilghan xelq'ara qa'idige hörmet qilish” wedisining qanchilik quruq gep ikenlikini körsitip bergenlikini bildürgen.

Xetning axirida yarwopa ittipaqining xitay bilen bolghan kishilik hoquq di'alogini toxtitip, ammiwiy teshkilatlatlar bilen bolghan qurulma xaraktérlik di'alogni algha sürüsh, xelq'araliq musteqil tekshürüsh élip bérip, Uyghur we bashqa türkiy milletlerge qaritilghan wehshilik we insaniyetke qarshi jinayetni tekshürüsh, bir da'imliq nazaret mixanizimi qurup, xitayning kishilik hoquq depsendichilikini b d t kishilik hoquq kéngishige doklat qilish, b d t kishilik hoquq aliy komissarining Uyghurlar weziyiti heqqidiki doklatini yene kéchiktürmey élan qilishqa chaqirish, Uyghur, tibet we xongkongdiki basturushta jawapkarliqi bar xitay emeldarlirigha qarita nishanliq imbargo qoyush qatarliq teleplerni otturigha qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.