Явропа иттипақиниң хитайда турушлуқ вәкили: “уйғурларниң әһвалидин қаттиқ әндишә қиливатимиз”

Явропа иттипақиниң хитайда турушлуқ вәкили 10-декабир “хәлқара кишилик һоқуқ күни” баянат елап қилип, уйғурларниң әһвалидин қаттиқ әндишә қиливатқанлиқи, хәлқараниң районда толуқ вә мустәқил тәкшүрүш елип беришиға йол қоюшни тәләп қилған. Баянатта йәнә тунҗи қетим етник, тил вә диний аз санлиқлар вә башқа кишиләрниң ички әзалирини көчүрүштәк җинайи, ғәйрий инсани вә ғәйрий әхлақий қилмишни тохтитиши керәклики тәкитләнгән.

Баянатта мундақ дейилгән: “явропа иттипақи шинҗаң уйғур аптоном районидики кишилик һоқуқ вәзийитидин, болупму кәң көләмлик тутқун қилиш, назарәт қилиш, диний етиқад әркинликини системилиқ чәкләш, шундақла уйғурлар вә башқа аз санлиқ милләт келишигә қаритилған мәҗбурий әмгәк, мәҗбурий туғут контроли, җинсий зораванлиқларға аит дәлилләт асасидики доклатлардин давамлиқ қаттиқ әндишә қилмақта”.

Баянатта ейтилишичә, явропа иттипақи хитайниң хәлқара қанунлардики мәҗбурийитини ада қилип, шинҗаң, тибәт вә ички моңғолдики етник вә диний аз санлиқ милләтләрниң һоқуқини һөрмәт қилишқа вә қоғдашқа чақиридикән.

Баянатта йәнә “б д т кишилик һоқуқ алий комиссариниң вәзийәтни мустәқил, обйектип, тәрәпсиз вә очуқ-ашкара баһалашни өз ичигә алған васитиләр арқилиқ шинҗаңдики кишилик һоқуқ вәзийитини һәл қилишқа илһамландуридиғанлиқи” тәкитләнгән. Баянатта ейтилишичә, явропа иттипақи йәнә мустәқил хәлқаралиқ мутәхәссисләр, чәтәллик журналистлар вә дипломатларниң шинҗаң, тибәт вә хитайниң башқа җайлирида һәқиқий, чәклимисиз вә назарәтсиз зиярәт қилишиға йол қоюшни чақиридикән.