Yawropa parlaménti xitayning Uyghurlargha qiliwatqan zulumini “Insaniyetke qarshi jinayet we éghir irqiy qirghinchiliq xewpi” dep qobul qildi

9-Iyun küni, yawropa parlaménti xitay hökümitining Uyghurlargha qaritiwatqan zulumini “Insaniyetke qarshi jinayet we éghir irqiy qirghinchiliq xewpi” dep békitken. Mezkur qarar yawropa parlaméntida nahayiti zor köpchilik awazning qollishi bilen maqulluqtin ötken bolup, Uyghurlar üchün tarixiy weqelerning biri bolup hésablinidiken.

Dunya Uyghur qurultiyi bu heqtiki bayanatida yawropa parlaméntining qararini hazirghiche yawropa parlaméntida Uyghurlar mesiliside qobul qilin'ghan eng keskin we eng küchlük qararlarning biri, dep bahalighan. Dunya Uyghur qurultiyi bayanida mundaq dégen:

“Dunya Uyghur qurultiyi (WUC) bügünki yawropa parlaméntida xitay hökümitining sherqiy türkistandiki Uyghur xelqige qaritiwatqan sistémiliq zulumining insaniyetke qarshi turush jinayiti we éghir irqiy qirghinchiliq xewpi ikenlikini étirap qilidighan qararning mutleq köp awaz bilen maqullan'ghanliqini qarshi alidu. Yawropa ittipaqi we uninggha eza döletler b d t irqiy qirghinchiliq ehdinamisige asasen barliq zörür tedbirlerni qollinip, wehshiylikni tügitishke chaqirilghan bu qarar Uyghur xelqige adalet élip kélishke chaqirilghan tarixi muraji'etname bolup hésablinidu”.

Melum bolushiche, xitayning Uyghurlargha qiliwatqan zulumi “Insaniyetke qarshi jinayet we éghir irqiy qirghinchiliq xewpi” dep qobul qilin'ghan bu qararda yawropa ittipaqi we uninggha eza döletler b d t ning “Irqiy qirghinchiliq ehdinamisi” diki mejburiyetlirini ada qilish, hem shundaqla xitayning bu jinayette rol oynighan chén chüen'go we jaw kéji qatarliq emeldarlirini jazalash qatarliq maddilar orun alghan.

Dunya Uyghur qurultiyi re'isi dolqun eysa bayanatida yéqinda ashkarilan'ghan “Shinjang saqchi höjjetliri” ning yawropa parlaméntining Uyghur élidiki weziyetning texirsizliki we ünümlük heriketning zörürlükini hés qilishi üchün intayin muhim oyghinish chaqiriqi bolghanliqini mu'eyyenleshtürgen we: “Yawropa ittipaqi we uninggha eza döletler emdi qarardiki bu chaqiriqlargha emel qilishi we pütün küchi bilen hökümetler we teshkilatlar bilen hemkarliship, Uyghurlargha qaritiliwatqan irqiy qirghinchiliqni axirlashturushi kérek” dégen.

Dunya Uyghur qurultiyi mezkur bayanatida qararning qobul qilinishida küch chiqarghan barliq parlamént ezalirigha rehmet éytip, ularning Uyghurlarning kishilik hoquqi we erkinlikini qoghdash iradisige apirin oqughan.