Yawropa parlaméntining ezasi bütiköfér yawropa parlaméntida Uyghurlar heqqide imza toplash herkiti bashlidi

Muxbirimiz erkin
2020-10-02
Share

Yawropa parlaméntining ezasi, gérmaniyelik siyasiyon réynhart bütiköfér yawropa parlaméntida Uyghurlarni qoghdap, xitayni jazalash toghrisida imza toplash herkiti bashlighan. Nöwette uninggha yawropa parlaméntining nurghun ezaliri, siyasiyonlar we sheher bashliqliri imza qoyghan. Réynxart bütiküfér bu heqtiki mektubida Uyghurlarning sistémiliq tughmas qilish, mejburiy bala chüshürüsh, balilarni ata-aniliridin ayriwétish, öktichilerge ölüm jazasi bérish, ayallarni xitay kompartiye kadirliri bilen bille yétishqa mejburlash, keng kölemlik basqunchiliqqa uchrashtek éghir ehwallargha duch kelgenliki, shinjang Uyghur aptonom rayoni "Insanliqni inkar qilishning yene bir atalghusigha aylinip qalghanliqi" ni tekitligen.

Uning tekitlishiche, xitayning qilmishini tenqid qilip qoyush kupaye qilmaydiken. U küchlük heriket bolmisa "Hergiz qaytilanmaydu" dégen sözlerning ehmiyiti bolmaydighanliqi, "Shunga küchlük we téz heriketke ötüsh kérekliki" ni bildurgen. Uning tekitlishiche, hökümetler xitay emeldarlirigha qarita nishanliq imbargo yürgüzüshi, döletlerning qanun chiqirip, xelq'ara shirketlerning bu jinayetke shérik bolushining aldini élishi, b d t ning lagérlarda tekshürüsh élip bérishi, döletlerning qanun chiqirip, Uyghurlarni qobul qilishi we qollishi kérek," iken.

U mektubining axirida mundaq dep tekitligen: "Uyghurlar üchün heriket qilish özimizni 'erkin dunya' dep teripleshning bir yoli. Bu özimizning néme ikenlimiz we qandaq bolmaqchi ikenlikimizning teripleydu. Adaletsizlik we mustebitlikning ghelibe qilishigha yol qoyamduq yaki insanning izzet-hörmiti, erkinlikini qoghdash öchün zörür tedbirlerni alamduq? hazir pütün yer shari omumiyyüzlük heriketke kélishning waqti keldi."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.