Yawropa parlaméntida Uyghurlarning nöwettiki weziyiti heqqide nutuq sözlendi

Muxbirimiz sada
2018.10.05

4-Öktebir yawropa parlaméntida élip bérilghan “Shinjang Uyghur aptonom rayonidiki Uyghur we qazaq millitining keng kölemlik tutqun qilinishi” heqqidiki keskin munaziride yawropa komissiyonining mu'awin bashliqi fédérika mogérini söz qilip, Uyghur diyaridiki yerlik musulman xelqliri duch kéliwatqan zulumlargha yéqindin diqqet qiliwatqanliqini bildürgen.

Fédérika mogérini sözide yawropa ittipaqining Uyghur we bashqa yerlik milletlerning xitay hökümiti teripidin qattiq teqipke uchrawatchanliqigha qarita endishisini bayan qilghan. U mundaq dégen: “Uyghur diyaridiki kishilik hoquqning barghanséri depsende qilinishigha a'it ademning ishen'güsi kelmeydighan doklatlar bizni qattiq endishige saldi. Bolupmu birleshken döletler teshkilati chiqarghan ‛irqiy kemsitishni tügitish‚ heqqidiki yekün xaraktérlik tekshürüsh doklati bizning téximu diqqitimizni tartti. Bu doklat pütün dunyagha Uyghurlarning teqib astigha élinishi, erkin sayahet qilishigha cheklime qoyulushi hem chet'ellerge chiqqan Uyghurlarning mejburiy xitaygha qayturup kélinishi qatarliq bir yürüsh teqib sistémisining ich yüzini échip körsetti.”

U sözide yene yawropa ittipaqining tewelikige kirip siyasiy panahliq iltijasi sun'ghan bir qanche Uyghur teminligen uchurlarnimu misalgha élip ötken: “Yawropa ittipaqi tewelikidiki döletlerde yashawatqan Uyghurlar özlirining xitay hökümiti teripidin yoluqqan bésim-tehditlirini bizge anglatti. Ularning beziliri xitay hökümiti teripidin qaytip kélishke yaki yawropadiki Uyghur siyasiy pa'aliyetchilirining uchurlirini teminleshke zorlinidiken. Chet'elge oqushqa yaki sayahetke chiqqanlarning yurtida qep qalghan a'ile tawabi'atlirining pasportliri pütünley yighiwélin'ghan iken. Ularning xitaydin qéchip chiqishi mana mushundaq usullar bilen aldi élinidiken.”

Fédérika moxérini axirida yawropa ittipaqining munasiwetlik orun we shexsler bilen mushu mesililerni muhakime qiliwatqanliqini bildürgen. Uningdin bashqa yene özlirining birleshken döletler teshkilati kishilik hoquq aliy komissarining Uyghur diyarini ziyaret qilish iltimasini tamamen qollaydighanliqini bayan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.