Yawropa parlaméntining Uyghur qirghinchiliqi heqqidiki qarari xitayni bekla chichangshitti

Muxbirimiz eziz
2022.06.10
Share on WhatsApp
Share on WhatsApp

9-Iyun küni yawropa parlaménti mutleq köp awazning qoshulushi bilen xitay hökümitining Uyghur diyaridiki zulum we basturushlirini “Irqiy qirghinchiliq” dep qarar alghanidi. Xitay hökümiti buninggha oxshimighan yollar arqiliq naraziliq bildürüp, özlirining bu qarargha qet'iy qarshi turidighanliqini bildürdi.

“Xitay xewer tori” ning 10-iyundiki xewiride éytilishiche, xitay hökümitining yawropa ittipaqidiki wekiller ömiki shu küni ötküzülgen muxbirlarni kütüwélish yighinida bu heqtiki so'allargha jawab bérip “Yawropa parlaméntining arilashmaydighan ishi qalmidi. Ular hazir bizge zeherxendilik bilen hujum qilip shinjangda qirghinchiliq boluwatidu, dep jar séliwatidu. Bu hökümitimizning shinjangni idare qilish ishlirigha arilashqanliq, shuningdek xelq'ara qanunlarghimu xilap qilmish” dégen.

Xitay wekilliri bu heqte yene bir qétim kona muqamni tekrarlap “Ötken 70 yilda shinjangdiki siyasiy, iqtisadiy we medeniyet saheside tarixta misli körülmigen güllep yashnash barliqqa keldi. Emma gherbtiki düshmen küchler buni körüshni xalimaywatidu” dégen. Shundaqla Uyghur diyaridiki mesilining térrorluq we ashqunluqqa qarshi turush kürishi ikenlikini, “Irqiy qirghinchiliq” heqqidiki herqandaq hökümning put tirep turalmaydighanliqini, Uyghur nopusining 1950-yillardiki üch yérim milyondin köpiyip hazir 11 milyondin ashqanliqini tekitligen. Xitay tashqi ishlar ministirliqi we bashqa hökümet tarmaqlirimu mushu xildiki pikirlerni qilghan.

Xitay hökümitining Uyghur diyaridiki qirghinchiliqqa da'ir taghdek ispatlar aldidimu yenila buni izchil inkar qilishi heqqide söz bolghanda “Kommunizm qurbanliri xatire fondi” ning tetqiqatchisi doktur adriyan zénz “Meyli xitay hökümiti qandaq shekilde inkarchiliq meydanini ipadilishidin qet'iynezer emdi ular dunyani aldap kételmeydu. Chünki hazir melum bolghan delil-ispatlar quruq gepler bilen aghdurulup ketmeydu” deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet