46 Тәшкилат ортақ баянат елан қилип, явропа иттипақини хитай билән һәмкарлашмаслиққа чақирди

Мухбиримиз ирадә
2022.03.31
Share on WhatsApp
Share on WhatsApp

1-Април күни явропа иттипақи-хитай башлиқлар йиғини өткүзүлидиған болуп, син арқилиқ өткүзүлидиған бу йиғинда явропа комиссийониниң рәиси урсула вон дер лейен вә явропа кеңишиниң рәиси чарлез мишел, хитай рәиси ши җинпиң вә хитай баш министери ли кечяң билән көрүшидикән.

Бу мунасивәт билән һәрқайси дөләтләрдә турушлуқ 46 уйғур, хоңкоң, тибәт вә тәйвән тәшкилатлири бирликтә явропа комиссийониниң рәиси урсула вон дер лейен вә явропа кеңишиниң рәиси чарлез мишелға бирләшмә мәктуб йоллап, улардин “бу һалқилиқ пәйттә хитайға қарши қәтий болуш” ни тәләп қилған.

Улар мәктубида мунуларни тәкитлигән: “русийә украинаға һуҗум қилған бир пәйттә, хитай тәйвәнгә давамлиқ һәрбий тәһдит салмақта. Хоңкоң, шәрқий түркистан вә тибәтттики вәһшийликлирини давамлаштурмақта. Һазир кишилик һоқуқни дуня демократийәсини җанландурушниң бир йоли сүпитидә хитайға қаратқан сиясәтләрниң мәркизигә қоюшниң вақти кәлди. Биз явропа иттипақиниң 1-апрелдики башлиқлар йиғинида ениқ, бирликкә кәлгән вә қәтий тәләпләрни оттуриға қоюшини тәләп қилимиз. Һазир явропа иттипақи хитай билән мунасивитини яхшилайдиған пәйт әмәс.”

Юқириқи 46 тәшкилат ортақ баянатида явропа иттипақи рәһбәрлиридин сөһбәт җәрянида “русийәниң украинаға қаратқан таҗавузини қоллимаслиқ, тәйвәнгә таҗавуз қилмаслиқ, шәрқий түркистандики инсанийәткә қарши җинайитини, тибәт вә хоңкоңдики зулумлирини аяқлаштуруш һәққидә хитайни кәскин агаһландуруш” ни тәләп қилған. Баянатта йәнә: “кишилик һоқуқ вә демократийәниң явропа-хитай мунасивитиниң мәркизи икәнликини испатлайдиған пәйт кәлди,” дейилгән.

Ахирида, улар явропа иттипақиниң хитайға иқтисадий җәһәттин бағлинип қелиштәк әһвалға хатимә бериш үчүн зөрүр тәдбирләрни қоллинишқа чақирған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.